Saladaǵy qurylymdar men uıymdar ókilderi, qoǵam belsendileri qatysqan kezdesýde resmı reńk sezilgen joq, esesine elge qajetti usynys-pikirler basa aıtyldy. Qazir el arasynda talqyǵa túsip júrgen «Beıneý-Shalqar» avtojoly jaıly usynys bildirgen oblystyq qoǵamdyq keńes múshesi Bolat Nurqojaev qoǵamdyq tyńdaýlarda jurtshylyq bul joldy Sekseýil arqyly salýdy surap otyrǵanyn aıtyp, onyń tıimdiligine túrli dálelder keltirdi. Bul máseleni Aral aýdanynan kelgen azamattar da kóterdi.
Oblystyq ardagerler keńesi tóraǵasynyń orynbasary О́mirbek Shámenovtiń pikirinshe, jergilikti jol salasyndaǵy kompanııalardyń jumysy sapa jaǵynan sheteldik áriptesterinen kem túspeıdi. Tehnıkamen qamtylýy jaǵynan da kemshin túsip jatqan tusy joq. «Aımaq úshin mańyzdy joba – «Batys Eýropa-Batys Qytaı» avtodáliziniń Qyzylorda men Aqtóbe aralyǵyn 4 jolaqtyǵa keńeıtý barysynda osy másele eskerilýi kerek», dedi ardager.
– Osy jol 2010 jyly bastalǵanda da qosalqy merdiger retinde jergilikti kompanııalar jumys istedi. Qazirgi jol sapasy olardyń óz jumysyn jaqsy meńgergendigin kórsetedi, – dedi О́mirbek Shámenov.
Mınıstrdiń aıtýynsha, Qyzylorda men Aqtóbe aralyǵyndaǵy avtojoldy 4 jolaqtyǵa keńeıtý keler jyly bastalady. Qazir Aqtóbe oblysy aýmaǵyndaǵy jumystar jobasy ázirlenip qoıǵan. Jalpy aldaǵy 5 jylda elimizde 8 myń shaqyrym respýblıkalyq jol qaıta jańǵyrtýdan ótpek. Mınıstr osy kúni otandyq jol kompanııalarynyń mundaı aýqymdy jobalardan qalys qalmaýy qadaǵalanyp otyrǵanyn aıtty.
Kezdesýde «Qyzylorda-Jezqazǵan» avtojoly jobasy jaıly da sóz boldy. Ásirese Qyzylorda oblysy aýmaǵynda qaıta jańǵyrtý jumystary qarqyndy júrip jatyr. Keler jyly joldyń biraz bóligi paıdalanýǵa berilmek.
– Búgingi kezdesýde el suraýyna oraı «Beıneý-Shalqar» jobasyn biraz talqyladyq. Kóp usynys aıtyldy. Osyǵan baılanysty keler jyl basynda taǵy da qosymsha qoǵamdyq keńes ótkizýge kelistik, – dedi Kólik mınıstri Marat Qarabaev BAQ ókilderine arnalǵan brıfıngte.
QYZYLORDA
