Elordada kəsipker, mesenat, «Altyn Qyran Foundation» qoǵamdyq qorynyń negizin qalaýshy Islambek Saljanovtyń bastamasymen stýdenttermen kezdesý ótti. Belgili mesenat elimizdegi barlyq qalalyq jəne aýdandyq kitaphanaǵa ınnovasııalyq tehnologııalar týraly 8 myń kitap syıǵa tartyp otyr.
Is-sharaǵa halyqaralyq «Qazaq tili» qoǵamynyń prezıdenti Raýan Kenjehanuly, «Qazposhta» AQ basqarma tóraǵasy Əsel Janasova, Ulttyq akademııalyq kitaphananyń dırektory Ǵazıza Nurǵalıeva jəne Blokcheın tehnologııalary men derekter ortalyqtary qaýymdastyǵynyń basqarma tóraǵasy Dəýren Qarashev qatysty.
Kezdesý barysynda Islambek Saljanov qazaq tiliniń bilim berýdegi ózektiligine toqtalyp, kitaptardy qazaq tiline aýdarý halqymyz úshin basty mindetterdiń biri ekenin jetkizdi.
– Búgin biz, «Altyn Qyran Foundation», Qazaqstan blokcheın tehnologııalary jəne derekter ortalyqtary qaýymdastyǵy, Halyqaralyq «Qazaq tili» qoǵamymen, sondaı-aq Ulttyq akademııalyq kitaphanamen, «Qazposhta» AQ-men birlesip atqarǵan jaqsy jumysymyzben bóliskimiz keledi. Qazaq tilindegi jańa tehnologııalar týraly tórt əlemdik bestseller elimizdiń barlyq qalalyq jəne oblystyq kitaphananyń sórelerine jiberiledi. Olar «Blokcheın tehnologııasy», «Aqshanyń qysqasha tarıhy», «Krıptovalıýta dəýiri», «Shyndyq mashınalary» – eń qoljetimdi jəne blokcheın tehnologııalary, krıptoındýstrııa, WEB3 qandaı ekeni jəne progress qaıda jatqany týraly qyzyqty 4 əlemdik kitap, – dedi mesenat.
Bul kitaptardyń barlyǵyn onlaın formatta «Altyn Qyran» qorynyń resmı saıtynan qoljetimdi túrde tabýǵa bolady.
Is-sharada Blokcheın tehnologııalary jəne data ortalyqtary qaýymdastyǵynyń basqarma tóraǵasy Dəýren Qarashev kitaptardyń mańyzy jóninde aıtty.
– Blokcheın jańa tehnologııalar men ınnovasııalardy damytýǵa aıtarlyqtaı əser etedi. Búginde jas kəsipkerler ortalyqtandyrylmaǵan jobalardy qurý, qarjylyq ınklıýzııany jaqsartý jəne bilim berý, úkimet, energetıka, logıstıka, densaýlyq saqtaý jəne ekonomıkamyzdyń basqa sektorlary sııaqty ərtúrli salalardaǵy ashyqtyqty arttyrý úshin blokcheındi paıdalanyp jatyr», – dedi ol.
Aıta keteıik, «Altyn Qyran Foundation» qoǵamdyq qory qaıyrymdylyq kómek kólemi boıynsha Qazaqstandaǵy eń iri qorlardyń ondyǵyna kiredi jəne úsh negizgi baǵytta – bilim berý, mədenıet jəne əleýmettik ınfraqurylym boıynsha jumys atqarady.
