Bul ıgilikti iske uıytqy bolǵan – oblys ákimi Beıbit Isabaevtyń ózi. Byltyr ǵana Jetisý oblystyq fılarmonııasynyń qurylýyna muryndyq bolǵan óńir basshysy qoǵam zııalylarymen aqyldasa kele Jetisýdyń án ónerin asqaqtatqan alyp tulǵa Dáneshtiń murasyn dáripteýdi tapsyrǵan edi. Mine, sol maqsat-múddeniń negizinde Taldyqorǵandaǵy oblystyq fılarmonııa ǵımaratynyń tóbesine áıdik ánshiniń esimi jazyldy. Osy oqıǵaǵa oraı óńir ortalyǵynda «Jetisý dúldúli» atty merekelik konsert uıymdastyryldy.
Taldyqorǵan qalasyndaǵy Nazarbaev kóshesi, 101-úıdiń qabyrǵasyna «Bul úıde Qazaqstannyń Halyq ártisi Dánesh Raqyshev turǵan» degen jazýy bar taqta ornatyldy. Is-sharaǵa oblys aqsaqaldary, mádenıet salasynyń ókilderi qatysty. Arnaıy qonaqtardyń biri Halyq ártisi Ramazan Stamǵazıev jetisýlyqtarǵa óziniń izgi tilegin bildirdi.
«Búgingi kún Jetisý jurtshylyǵynyń ǵana emes, tutas qazaq óneriniń qýanyshy dep bilemin. Qazaqtyń án ónerine úlken úles qosqan Dánesh aǵamyz turǵan qasıetti shańyraqqa taqta ornatylyp otyr. Men sańlaq ánshini eń alǵash ret óner baıqaýynda kórdim, onda baıqaýǵa qazylyq etýge keldi. Sol shaqta tanystym, adamgershiligine, talantyna tánti boldym. Búginde Dánesh aǵanyń shákirtteri – ónerde óz oryndaryn tapqan belgili ánshiler. Dánesh Raqyshevtyń esimi qazaq ónerimen birge jasaı beredi», dedi ol.
Taldyqorǵan qalalyq ardagerler keńesiniń tóraǵasy Aqshabaı Kerimbekov, Dánesh Raqyshevtyń qyzy Gúlnar jáne ánshiniń shákirtteri sóz alyp, kópshilikke quttyqtaý lebizderin jetkizdi.
Atap ótsek, oblystyq fılarmonııaǵa Qazaqstannyń halyq ártisi, ánshi, kompozıtor Dánesh Raqyshevtyń esimi berilýine oraı fılarmonııa ǵaımaratynda arnaıy konsert ótti. Oǵan Dánesh Raqyshevtyń tól shákirtteri, atap aıtqanda, Qazaqstannyń eńbek sińirgen ártisi Myrzahmet Muqamanov, Qazaqstannyń eńbek sińirgen qaıratkeri Baqbergen Asqarbekov, mádenıet qaıratkeri Abylaıhan Qarmysov, Serikbol Shynybaev, Nurjan Janpeıisov jáne izin jalǵastyrýshy, mádenıet salasynyń úzdikteri, Arafat Ysqaqov, halyqaralyq baıqaýlardyń laýreaty Quralaı Shaıahmetova syndy óner maıtalmandary qatysty. Sonymen qatar Halyq ártisi Ramazan Stamǵazıev te óz ónerin pash etti. Konsertte Muqan Tólebaev atyndaǵy halyq aspaptar orkestri, «Jetisý sazy» folklorly-etnografııalyq ansambli jáne oblys ónerpazdary óner kórsetti.
«Dánesh Raqyshev – qarapaıym ómir keshken adam. Jarkent óńiriniń Taldy aýylynda týyp, tórt jasynda zorlap kolhozdastyrý zardabynan qashqan otbasymen birge Shyǵys Túrkistan asyp ketedi. Onyń minez-qulqy, ónerge qushtarlyǵy qazaqy ortada qalyptasady. Ákesi Raqysh aýyl arasynda aıtysqa qatysqan aqyn, ánshi, seri minezdi kisi bolypty, al sheshesi Tájihan ánshi eken, qaıym aıtysqa da qatysqan kisi deıdi. Raqysh ekeýi sondaı aıtys ústinde tabysypty. Dákeńniń tapqan sheshesimen qatar, Aqmanar atty baqqan sheshesi de bolǵan. Aqmanar bet bitkenniń ádemisi, asa ajarly áıel bolypty, tıgeni Raqyshtyń jaqyn aǵaıyny, jazýshy, marqum inimiz Tursynǵazy Álpeıisovtiń týysy eken. Seri jigit pen sulý kelinshek kóńil qosyp, Raqysh alyp qashyp úılenip, aǵaıyn arasy biraz dúrbeleńge túsipti. Aqyry aqsaqaldar ashýdy aqylǵa jeńdirip, eki jaqty ebin taýyp tatýlastyrypty. Ákeniń qanynda bar sol serilik Dákeńe de serik bolypty. On jasynan óleń aıtyp kózge ilinse, on besinde seri bala atanypty. Áýeli syrnaı tartyp án salsa, keıin dombyraǵa birjola aýypty», deıdi jazýshy Beksultan Nurjekeev.
Eske salsaq, Dánesh Raqyshev 1986 jyly Qazaq KSR halyq ártisi ataǵyna ıe boldy. Qazaqtyń án qorjynyna 150-den astam Ásettiń ánderin, halyq ánderin, basqa da halyq kompozıtorlary men qyrǵyz ánderin, Qazaqstan kompozıtorlarynyń jáne 100-ge jýyq óz ánin asqan sheberlikpen oryndap qaldyrdy. Jetisýda Dánesh Raqyshevtyń esimi ánshilik-oryndaýshylyq mektebin qalyptastyrýshy tulǵa retinde tarıhta qaldy. 90-jyldary Taldyqorǵandaǵy qazaq mektep-ınternatynda jáne Jetisý memlekettik ýnıversıteti mýzyka fakýltetinde óz klasyn ashyp, talapty balalar men jastardy ánshilikke baýlydy.
Jetisý oblysy
