Mektep oqýshylary bes ýnıversıtetti, zerthanalardy, stýdenttik úılerdi aralap, qabyldaý komıssııalarymen, eldegi sheteldik stýdentterdiń tynys-tirshiligimen tanysty. Sondaı-aq jas ǵalymdar men bolashaq kóshbasshylar daıarlaýdaǵy tálim-tájirıbesimen tanysty. Bul óńirdegi jastardyń álemge qarap bet túzeýine úlken múmkindik bermek.
Shynynda árbir joǵary oqý ornynyń óz ereksheligi bar. Mysaly, Korıo ýnıversıteti – eldegi eń kóne oqý oryndarynyń biri. Ataqty túlekterdiń qatarynda el prezıdentteri de bar. Bilim ordasynda 59 akademııalyq fakýltet pen baǵdarlama jumys isteıdi. Onyń árqaısysy – bir-bir mektep.
12-synyp oqýshysy Asqar Qalıǵa Koreıanyń ǵylym jáne tehnologııa ınstıtýty (KAIST) unady. Bilim shańyraǵy álemdegi eń bedeldi jáne ınnovasııalyq ýnıversıtetterdiń biri retinde tanymal. Munda oqyǵan bilimpazdar kez kelgen memlekette erkin qyzmet ete alady. Tipti Azııa ýnıversıtetteri arasynda 8-orynda tur. «Ýnıversıtette qalaǵan mamandyqty tańdaýǵa bolady. Oqý aǵylshyn tilinde ótedi. Bul bizdiń júıege saı, sondyqtan eshqandaı qorqynysh joq. Ýnıversıtet tamasha stıpendııalyq júıeni usynady. Sondaı-aq oqýdy bitirgennen keıin Google, LG, Samsung, Audi sııaqty iri kompanııalarda jumys isteýge múmkindik bar», deıdi Asqar Qalı.
Yonsei ýnıversıteti bolsa Koreıanyń «Plıýsh lıgasynyń» ataǵyn laıyqty túrde ıelenip keledi. Bul oqý orny 10-synyp oqýshysy Aıym Baýyrjanqyzyna erekshe áser qaldyrdy. Yonsei – Seýl ulttyq ýnıversıtetimen jáne Korıo ýnıversıtetimen birge eldegi eń bedeldi úsh (SKY) joǵary oqý ornynyń biri. Úsh ýnıversıtettiń kez kelgenine túsý – tabysty bolashaqtyń kepili. Jas maman mansap pen joǵary áleýmettik mártebe alý úshin sol oqý oryndaryn jıi tańdaıdy. «Gýmanıtarlyq baǵdarlamalary birden elitip áketedi. Siz birinshi oqý jylynyń sońyna qaraı óz mamandyǵyńyzdy tańdaı alasyz. Bıyldan bastap Yonsei ýnıversıteti NIS túlekterinen usynys hat talap etpeıdi. Bul biz úshin taǵy bir tamasha múmkindik. Bolashaqta osynda oqyǵym keledi», deıdi Aıym.
Sapar barysynda mazmundy baǵdarlama uıymdastyryldy. Jas saıahatshylar tarıhı róli joǵary «Kıonbokgýn» saraıyn, «Samsýng» murajaıyn, áıgili «Nant» aspazdyq shoýyn tamashalap, Lotte World Adventure oıyn-saýyq saıabaǵyn aralady. Koreıanyń mádenı murasyna qanyǵyp, óz eliniń salt-dástúrimen salystyrdy.
Taldyqorǵandaǵy zııatkerlik mektep pen Koreıa arasyndaǵy bilim salasyndaǵy yntymaqtastyq týraly memorandým 2020 jyly jasalǵan. Sodan beri jyl saıyn oqýshylar saıahat jasap, armandaryna qol sozyp keledi. Eń bastysy, zamanaýı bilim men ǵylym salasyndaǵy erekshelikterdi ózara ortaǵa salyp, jastardyń sanasyna sáýle túsirý ústinde. Taldyqorǵandyq oqýshylar 2011 jyldan bastap koreı tilin úırenip júr. 2018-2019 oqý jylynda 10-synyptarǵa koreı tilin ekinshi shet tili retinde oqytý mindetti bolyp sanalady. Sóıtip, dástúrli túrde oqý josparyna engizildi. Endi Koreıaǵa qonaqqa barǵan árbir shákirt jergilikti turǵyndarmen erkin tildese alady. 2012-2015 jyldary mektepte «Qazaqstan-Koreıa» bilim almasý jobasy júrgizildi. Oqýshylar Seýl qalasyndaǵy Tanje mektebinde oqyp, tájirıbe jınady.
Jetisý oblysy
