Asylynda, volonterlerdiń erikti erligin udaıy nasıhattaýymyz qajet. О́ıtkeni álem ábigerge túsip, kóptiń kóńili kúpti bolǵanda bir-birine kómektesip, barymen bólisetin osy janashyrlar. Tól genetıkadaǵy jipti úzbeı, qoǵamnyń meıirlene túsýine sep bolyp júrgenderdiń biri – Aqerke Iskanderova.
«Volonterlikke ómirlik ustanymym men kez kelgen ortadaǵy belsendiligim jol ashty. Mektep kezinen eriktilikti serik ettim. Árdaıym ekologııalyq naýqandarǵa qatysyp, qarttarǵa kómek kórsetip júretinbiz. Keıin stýdenttik shaqta túbegeıli volonterlikke kiristim. «EKSPO» halyqaralyq kórmesinde, qalalyq eriktiler shtabynda bolyp, dárigerlerge, polıseılerge, keden qyzmetiniń ókilderine, mádenı uıymdardyń qyzmetkerlerine belsendi túrde qolǵabys ettim. Artynsha «Jastar rýhy» jastar qanatyna qosyldym. Orynbasarlyq qyzmetke kóterildim. Kúndelikti ómirde, qoǵamdyq qyzmette volonterler tarapynan kórsetiletin kómek úlken ról atqaratynyn esimizden shyǵarmaýymyz kerek. Jastar qanatynyń kez kelgen ókili nemese belsendisi men sekildi qyzmet jolyn eriktilikten bastady desem, qatelespeımin. Mektep oqýshysynan bastap qarııalarymyzǵa deıin árqashan qolushyn sozýǵa umtylyp turatyn bizdiń azamattar boıyna meıirimdilik, adaldyq, eńbekqorlyq syndy qasıetterdi jınaǵan. Bizdiń top elimizdegi eń úlken ári eń kóp jastyń basyn qosqan uıym retinde óz qataryndaǵy rýhy bıik volonterimen maqtanady. Volonter bolý ońaı, ol bizdiń ár paıdaly ádetimiz ben ónegeli isimizde kórinis tapqan. Ári eriktilik – jas talǵamaıtyn, saýapty is», deıdi «Jastar rýhy» jastar qanaty tóraǵasynyń orynbasary.
Búginde «Jastar rýhy» sapyndaǵy bir top volonter ardagerlerdi ardaqtap, kóshe sypyrýshy azamattarǵa kómek kórsetý, tótenshe jaǵdaı kezinde aldyńǵy qatardan tabylý, halyqqa gýmanıtarlyq kómek úlestirý nemese apat bolǵan oryndy qalpyna keltirý, vandaldar qaldyrǵan sýretterdi joıyp, tarıhı eskertkishterdi tazalaý, polısııa qyzmetkerine serik bolyp, qoǵamdyq tártipti saqtaýǵa shaqyrý, qaraýsyz qalǵan janýarlarǵa pana tabýǵa járdemdesip júr.
«Biz qandaı jaǵdaıda da kóppen birge boldyq. «Amanat» partııasynyń janyndaǵy jastar elimizde oryn alǵan tótenshe jaǵdaılar kezinde aldyńǵy shepten tabyldy. 2019 jylda Arys qalasynda joıqyn jarylys bolyp, el dúrlikti. Oqys jaǵdaı bolǵan kúnnen bastap barlyq aımaqta gýmanıtarlyq kómek qabyldaý pýnktterin ashtyq. 750-den asa erikti Arys qalasynyń evakýasııalanǵan turǵyndaryn tirkeý jáne ornalastyrý, joǵalǵan balalardy izdestirý, gýmanıtarlyq kómekke jatatyn taýarlardy túsirýge qatysty. Volonterler kólemi 450 tonna gýmanıtarlyq kómekti qoımalarǵa jaıǵastyrdy.
Álemdi eseńgiretken indet tusynda Qazaqstannyń ońtústik aımaǵyndaǵy Maqtaaral aýdanynda birneshe eldi mekendi sý alyp, respýblıkalyq kólemnen bólek, óńirlik tehnogendi tótenshe jaǵdaı jarııalandy. Osy sátte jastar qanatynyń 500 volonteri Maqtaaral aýdanynda turǵyndardy evakýasııalaýǵa qatysty. Sý astynda qalǵan úılerdi qalpyna keltirýde eriktiler aýdan halqyna kómek kórsetti. Qurylys materıaldaryn jetkizip, 1000 tonnaǵa jýyq gýmanıtarlyq kómekti halyqqa taratty.
Qostanaıda bolǵan órt kezinde de shette qalmady. Tótenshe jaǵdaı jarııalanǵan sátten bastap, olar 3 qala men 17 oblysta gýmanıtarlyq kómek qabyldaý ortalyqtaryn ashty. Elimiz boıynsha 1300-den asa volonter Áýlıekólge kómek kórsetý úshin jumys istedi. Apat bolǵan aımaqta Aqmola, Qostanaı, Soltústik Qazaqstan, Túrkistan oblysy men Almaty, Astana qalasynan 300-ge jýyq volonter gýmanıtarlyq kómekti qoımalarǵa jaıǵastyrdy. Azyq-túlik pen qajetti zattardy turǵyndardyń úılerine jetkizip berdi. Volonterlerdiń kúshi 1200 tonnadan asa jınalǵan turmystyq qajettilikter, azyq-túlikter, qurylys materıaldary men tehnıkalyq jabdyqtardy turǵyndarǵa úılestirýge jumyldyryldy», dedi A.Iskanderova.
Qazaq «Kóp túkirse – kól», «Saýapty istiń úlken-kishisi bolmaıdy» dep jatady. Biraq irili-usaqty sharýanyń kóptiń kómegimen bitetini taǵy bar. Osy oraıda Aqerkeniń rýhtastary byltyr qytymyr qysta jylýsyz qalǵan Ekibastuzdaǵy otandastarymyzǵa azyq-túlik pen 1700-den asa elektr jylytqysh taratty.
Eldi eseńgiretken Abaı oblysyndaǵy alapat órt kezinde 500-den asa volonter halyqty evakýasııalaý, zardap shekken turǵyndarǵa gýmanıtarlyq kómek jetkizý, qutqarýshylarǵa ystyq tamaq, dári-dármek jáne kıim-keshek jóneltýde jumyldy. Bas-aıaǵy bes kúnde elimizdiń birqatar óńirinde 126,5 tonna gýmanıtarlyq kómek jınaldy.
«Jastar rýhynyń» turaqty ótkizip turatyn naýqandary da bar. Máselen, «Qaýipsiz qoǵam» aksııasy aıasynda polısııa departamentterimen birlese quqyqtyq tártipti saqtaý boıynsha 374 birlesken aksııa men reıd ótkizdik. Nátıjesinde, 8 300-den asa quqyq buzýshylyq anyqtaldy. Sondaı-aq 500-den asa tarıhı, mádenı jáne tabıǵı murany, eskertkishti vandalızmnen saqtaýǵa baǵyttalǵan respýblıkalyq aýqymdy naýqan uıymdastyrdyq. Oǵan 1500-den astam volonter qatysty. Qazirgi tańda qala, aýdan ishinde vandalızmmen kúresý jumystary júrgizilip jatyr. Al «Esirtkige jol joq» jobasy aıasynda sıntetıkalyq esirtki jarnamasy bar 5000-nan astam graffıtıdi joıdyq. Oǵan 1000-nan astam erikti járdemdesti. Sondaı-aq «TazaLike» ekologııalyq jobasy barysynda da qoǵamdyq oryndardy tazalaýǵa kómektestik. О́zderińiz biletindeı, 2020 jyly «Biz birgemiz!» jalpyulttyq aksııasy bastaldy. Oǵan respýblıka boıynsha 5 myń volonter jumyldyryldy. 320 myńǵa jýyq otbasy azyq-túlik sebetterimen jáne birinshi kezekte qajetti taýarlarmen qamtamasyz etildi. Turmysy tómen 100 myń otbasyna 5 mıllıon maska tegin taratyldy. Bul – volonterler atqaryp jatqan jumystardyń bir bóligi ǵana. Elim dep emirenip, halqym dep qyzmet etip júrgen volonterler eńbegi elenip, azamattardyń alǵysyna bólenetinine senimdimiz. Bastysy – bári otansúıgish, adal nıetpen júzege asyp jatyr», dedi volonter.
Jalpy, adamzat boıynda júrektiń orny bólek. Izgi nıetpen, aq peıilmen jasalǵan jaqsylyq júrekterdi jylytyp, jaqyndastyrady. Demek búgingi eriktilik jastardy erteńgi eldik tulǵa deńgeıine kóteretini anyq.
