Hat mátinine qaraǵanda, erli-zaıyptylar qaıǵyly oqıǵaǵa deıin de birneshe ret renjiskeni ańǵarylady. Bıshimbaev áıelinen ketpeýin ótinip, bárin túzeıtinin, bul jaǵdaıdy da eńseretinin aıtady.
«Qýandyq Bıshimbaev pen Saltanat Núkenovanyń toıynan beıneler joqtyń qasy. Jarııalanǵan jalǵyz vıdeoda jas-jubaılar syrt kózge óte baqytty kórinedi. Alaıda, arada 6 aı ótken soń Bıshimbaev áıelin jıi renjitýdi shyǵarǵan», deıdi baǵdarlama júrgizýshisi.
Atalǵan baǵdarlamada aıtylǵandaı, bul hat almasý qazanda bolǵan. Bıshimbaevtyń sózine sengen, S.Núkenova kúıeýin keshirip, ózara túsinbestikti umytyp, qıyndyqty birge eńserýge sheshim qabyldasa kerek.
«Jazda tórkinine barǵanda ata-anasyna kúıeýimen qarym-qatynastary qıyndap ketkenin, onyń minezi aýyr ekenin aıtypty. Ata-anasy jaraıdy olaı bolsa, úıge qaıt degen. Biraq kóp ýaqyt ótpeı Bıshimbaev Saltanatty raıynan qaıtaryp, uzaq ýaqyt boıy artynan qalmaı, qaıtyp kelýin ótinip júrdi. Qalaı kóndirý keregin jaqsy biledi, al Saltanat óte meıirimdi, janashyr qyz ǵoı, ony aıap qaıta bardy. Bıshimbaevtyń jan dúnıesindegi máseleni anyqtaý úshin oǵan jaqsy otbasylyq qarym-qatynas ornatýǵa kómekteser degen oımen psıholog jaldady», deıdi Saltanat Núkenovanyń kindik sheshesi Márzııa Ospanova.
