Sondyqtan da Shymqalada kóptegen mereke, aıtýly is-shara, qaıyrymdylyq aksııasy volonterlerdiń qatysýynsyz ótpeıdi. Osy rette naǵyz patrıot, qyzmeti úshin eshqandaı aqy almaıtyn, halyqqa jasaǵan qyzmetin mindetsinbeıtin, rýhanı qozǵaýshy kúshi jurttyń alǵysyna bólený, bata alý bolyp tabylatyn erikti jastarǵa alǵystan basqa aıtar tilek joq-aý, sirá.
Bul oraıda megapolıste Halyqaralyq volonterler kúnine oraı birneshe is-shara uıymdastyryldy. Atap aıtqanda, «Izgilikte jarysaıyq» qaıyrymdylyq qoǵamdyq qorynyń bastamasymen «Shymkent qalalyq volonterler» forýmy ótti. Qor basshysy Qaırat Dáribaev forýmnyń negizgi maqsaty týraly aıtyp berdi. Ol – kóshbasshy, bəsekege qabiletti volonter jastardyń sanyn arttyrý, olardyń boıyndaǵy jan-jaqty qabiletterdi oıatý. Sondaı-aq jıynda volonterlik toptar qalaı qurylatyny, ony basqarý qalaı bolatyny, josparlaýdyń, bıýdjet tartý máselesiniń ne ekeni tegis aıtylyp, túsindirildi.
«Shymkent qalasynda halyqaralyq volonterler kúnin qal-qaderinshe atap ótip jatyrmyz. Osyǵan baılanysty «Shymkent qalalyq volonterler» forýmyn joǵary deńgeıde uıymdastyrǵanymyzǵa qýanyp otyrmyz. Bizde maqsat – bireý. Ol «erikti» sózin jastar arasynda kóbirek nasıhattaý, onyń uǵymyn tereńirek túsindirý. Búgingi qoǵamǵa bilimdi, meıirimdi, boıyna barsha qundylyqtardy sińirgen jastar kerek. Ánsheıin qurǵaq sózben aıta bergen jaramaıdy, bizdiń qoǵam sondaı jastardy tárbıelep shyǵarýy qajet. Jastar osy forým aıasynda josparlaýdy úırendi, toppen jumys isteýdi meńgerdi. Kóshbasshylyq qasıetke qalaı jetýdi ıgerdi, volonterlik ómirde qýanyshtar men qıyndyqtar qatar júretinin bildi. Smart strategııasy jóninde aqparat pen kóp maǵlumat aldy», dedi «Izgilikte jarysaıyq» qaıyrymdylyq qorynyń basshy Q.Dáribaev.
Osy atalǵan volonterler forýmyna qaladan 50-den asa jas shaqyrylyp, olar túrli spıkerlerdiń eriktiler qozǵalysynyń baǵyttary boıynsha oqý-semınarlaryna qatysty.
Budan bólek Shymqalada «Men donormyn» aksııasy bastaý aldy. Joǵaryda atap ótkenimizdeı, atalǵan aksııa tikeleı erikti jastardyń qatysýymen ótti. Al osynaý is-sharanyń uıymdastyrylýyna qalalyq ishki saıasat jáne jastar isteri jónindegi basqarmasynyń «Jastar resýrstyq ortalyǵy» uıytqy boldy. Jastar aıtqan ýaqyttan keshikpeı «Nursat» shaǵyn aýdanynda ornalasqan qalalyq qan ortalyǵyna jınaldy. Bas-aıaǵy elý shaqty jas. Olardyń bári – qan tapsyrýǵa óz erkimen kelgen qalanyń jas volonterleri. Aksııa aıasynda mamandar qan men onyń komponentterin qaıta quıý arqyly adam ómirin qutqaryp qalýǵa bolatynyn, densaýlyǵyna qaýip-qater tóngen jandardyń ómirin uzartýǵa múmkindik týatynyn jastarǵa táptishtep túsindirip berdi.
Jastar resýrstyq ortalyǵy qoǵammen baılanys jáne aqparattyq taldaý bóliminiń basshysy Aqerke Sultannyń aıtýynsha, atalǵan aksııaǵa erikti jastar men Jastar resýrstyq ortalyǵynyń qyzmetkerleri qatysyp, tıisti mólsherde qan tapsyrdy, sóıtip, tótenshe jaǵdaıda kerek bolatyn qannyń qoryn molaıtty. Álbette aldymen donorlardyń densaýlyqtary tolyq tekserýden ótkiziledi, sosyn qan mólsheri, gemoglobın kórsetkishi men túrli aýrý belgileriniń bar-joqtyǵy zerthanalyq jolmen anyqtalyp, sodan keıin ǵana qan tapsyrýǵa ruqsat berildi.
M.Saparbaev atyndaǵy Ońtústik Qazaqstan gýmanıtarlyq ınsıtýtynyń birinshi kýrs stýdenti Mardan Orynbaı qan ortalyǵyna kelip, jyl saıyn qan tapsyratynyn aıtty. Saýapty is jasaýdan jalyqpaǵan ol ıgi bastamaǵa dostaryn da erte kelipti.
«О́mirde túrli oqıǵa bolady. Osyndaı kezde keıbir jandarǵa qan kerek bolyp qalatyny aıan. Sondyqtan ózgelerdiń ómirin saqtap qalý úshin qolushymdy sozý meniń azamattyq paryzym dep bilemin. Osylaısha, Jastar resýrstyq ortalyǵynyń bastamasymen qolǵa alynǵan «Men donormyn» aksııasyna óz erkimmen kelip, qan tapsyryp, ózge janǵa úmit syılaǵym keldi. Meniń qan tobym I topqa jatatyndyqtan absolıýtti donor bola alamyn», dedi erikti jas.
Aıta ketý kerek, joǵaryda atalǵan ortalyq Túrkistan oblysy men Shymkent qalasy boıynsha 42 medısınalyq mekemeni qan komponentterimen qamtamasyz etedi. Málimetke súıensek, jyl basynan beri 26 myń azamat osy mekemege kelip qan tapsyrǵan.
ShYMKENT
