Biz, aýyl balalary, 14 jasymyzdan eńbekke aralastyq, jazǵy demalysymyzda keńshardyń mal azyǵyn jınaý jumysyna qolǵabys ettik. О́mir boıy eshbir jumystan qashqan joqpyz. Zeınet jasyna kelgen kezde jalaqymyz tómen boldy. Aýylda eńbekaqy 40-50 myń teńgeden aspaıtyn. Sondyqtan zeınet jasyna kelgende bazalyq zeınetaqymyz 20-30 myń teńge tóńireginde ǵana boldy. 2018 jyly eńbek ótilimizdi eseptep, 12 800 teńge qosty. Zeınetaqy ósken saıyn paıyzdyq ósim tek bazalyq zeınetaqyǵa qosylady, bul mardymsyz. Mysaly, qazir ınflıasııa 23 paıyz bolsa, bizdiń zeınetaqymyzǵa qosylǵan 8-9 myń teńgeden ne paıda bar?
Biz – soǵystan keıin dúnıege kelip, balalyq, jastyq shaǵy eń aýyr kezeńge tap bolǵan býynbyz. Hal-qadirimizshe eńbek etip, balalarymyzǵa jáne ózimiz qartaıǵanda jumsaımyz dep bankke jınaǵan aq adal qarjymyz kúıip ketti. Ony qaıtarý úshin Úkimet eshteńe istegen joq.
Búginde teledıdardan elimiz boıynsha ortasha zeınetaqy mólsheri 125 myń teńge degen aqparat estip jatamyz. Alaıda 1955 jylǵa deıin dúnıege kelgen aýyl azamattarynyń zeınetaqysy óte tómen. Qazirgideı qymbatshylyq zamanda azyq-túlik qana emes, kommýnaldyq tarıfter, jol bıletteri, em-dom, dári-dármek baǵalary da sharyqtap ketti.
О́z basym ómir boıy Azǵyr, Kapýstın Iаr áskerı polıgondarynyń irgesinde, Orda aýdanynda turdym. Jasymyz 70-ten asyp ketti. Densaýlyǵymyz da jaqsy emes. Meniń óz atymnan jáne 1945-1955 jyldar arasynda týǵan eńbek ardagerleriniń atynan suraıtynym, bizdiń zeınetaqymyzdyń bazalyq bóligine qosa jınaqtaýshy bóligi de ósirilse eken. О́ıtkeni ınflıasııaǵa baılanysty zeınetaqymyzǵa qosylyp jatqan qosymsha mardymsyz. Tapqanymyz qapqanymyzǵa jetpeı jatyr.
Habdýlqadyr AQPEIISOV,
zeınetker
Oral
