Reseı azamaty týysymen birge Bishkekten Ekaterınbýrgke bara jatqan. Keshkilik Qaraǵandyǵa taıap qalǵanda aýa raıy kúrt nasharlap, júrgizýshi tizginge ıe bola almaı, joldan ushyp ketken. Kólik ıesi jeńil jaraqat alyp, janyndaǵy týysy jedel járdem shaqyrǵan.
Ýchaskelik polısııa qyzmetkeri qıyn jaǵdaıǵa tap bolǵan reseılikterge evakýator shaqyryp, kóligin tıeýge kómektesedi. Munymen qosa, jolaýshylarǵa kólikterin jyldam ári sapaly jóndeýge bolatyn tehnıkalyq qyzmet kórsetý ortalyǵyn taýyp beredi.
Arada biraz ýaqyt ótkennen keıin Qaraǵandy oblysy polısııa departamentiniń basshysy Sanjar Ádilovke Túmen oblysynda turatyn Reseı azamaty Aleksandr Orlovtan hat keledi.
«Jol apaty saldarynan týyndaǵan máseleni sheshýge kómektesken Qazaqstan Respýblıkasy Ishki ister mınıstrliginiń qyzmetkerlerine sheksiz alǵysymyzdy bildiremiz. Olar adamgershilik, qamqorlyq pen kásibı biliktilik tanytty. Jol polısııasy qyzmetkerleri men aýmaqtyq polısııa bólimsheleriniń shuǵyl túrde júrgizgen sharalary zardaptyń aýyrlyǵyn barynsha azaıtýǵa múmkindik berdi. Ásirese Abaı aýdanyna qarasty Topar polısııa bóliminiń ýchaskelik ınspektory Rýslan Ilııasovtiń kásibı sheberligin, adamgershiligin atap óter edik. Qıyn sátte osyndaı óz kásibine adal azamattardy kezdestirgenimizge qýanyshtymyz», delingen joldanǵan hatta.
Qaraǵandy oblysy
