Is-sharaǵa Aýyl sharýashylyǵy, Saýda jáne ıntegrasııa, Sý resýrstary jáne ırrıgasııa, Ǵylym jáne joǵarǵy bilim mınıstrlikteriniń, Shyǵys Qazaqstan jáne basqa da oblys ákimdikteriniń, S.Seıfýllın atyndaǵy QazATÝ, salalyq qoǵamdyq uıymdardyń ókilderi, aýyl sharýashylyǵy taýaryn óndirýshiler men sarapshylar qatysty.
Issapar barysynda depýtattar aýyl sharýashylyǵy nysandaryna «Vostok-Moloko» korporasııasy», «Bobrovka+» jáne «Maıly daqyldardyń tájirıbelik sharýashylyǵy» seriktestikterine baryp, sút taýarlary fermalarynyń jáne syr óndiretin jańartylǵan sehtyń jumysymen tanysty.
Otyrysty ashqan Serik Egizbaev Shyǵys Qazaqstan oblysyna kelgendegi basty maqsat – elimizdegi sút salasyndaǵy jobalardyń jaǵdaıy men fermerlerdiń tájirıbesin qaraý ekenin atap ótti.
– Statıstıkalyq málimetterge súıensek, qazir elde 6 mln tonnadan astam sút óndiriledi. Sonyń tek 2 mıllıonǵa jýyǵy, ıaǵnı 30 paıyzy óńdeledi. Bul osy salanyń damýyn qanaǵattandyra almaı otyr. Osyǵan baılanysty Memleket basshysy Qasym-Jomart Toqaev jalpy aýyl sharýashylyǵy ónimin óńdeýdi 70 paıyzǵa jetkizý jóninde mindet qoıdy. Qazirgi tańda respýblıkany 95 paıyz shıki sútpen qamtysaq ta, 4 mln tonnaǵa jýyq sút óńdelmeı qalyp otyr. Sondyqtan bizdiń dúkenderde Belarýs, Reseı elderinen kelgen ónimderdiń basym ekendigi jasyryn emes, – dedi depýtat.
Sonymen qatar Serik Egizbaev sút óndirý salasyndaǵy kadr tapshylyǵy máselesine de nazar aýdardy. Depýtattyń aıtýynsha, aýyldyq jerlerdegi sút fermalarynda jastardyń jumys isteýge yntalary joq. Sondyqtan jastarǵa sýbsıdııa arqyly turǵyn úı salý máselesin de kóterdi.
Jıyn barysynda Aýyl sharýashylyǵy vıse-mınıstri Erbol Tasjúrekov, halyqaralyq sarapshy Aleksandr Valebnyı, Respýblıkalyq sút palatasynyń atqarýshy dırektory Azamat Saǵynbaev, Aýyl sharýashylyǵy taýar óndirýshileri Farıd Ábitaev jáne Arman Ýataev sút óndirý salasynyń damýyna qatysty óz pikirlerin aıtty.
Otyrysta sútti mal sharýashylyǵyndaǵy óndirý jáne óńdeý, shıkizattyń sapasy, memlekettik qoldaý, jem-shóp óndirý, veterınarııa, seleksııalyq-asyl tuqymdandyrý jumystary, kadr daıarlaý jáne taǵy basqa ózekti máseleler talqylandy. Atap aıtqanda, qatysýshylar sút ónimderin óńdeý segmentiniń damymaǵanyn jáne onyń ımportqa táýeldiligin, jańa tehnologııalardy meńgergen jáne olarmen jumys isteý daǵdysy bar mamandardyń tapshylyǵyn jáne asyl tuqymdy maldyń sapasyn baǵalaýdyń halyqaralyq júıeleri men ıntegrasııalaý deńgeıiniń tómendigine toqtaldy.
Kóshpeli otyrys qorytyndysy boıynsha Úkimetke sút óndirý salasynyń problemalaryn sheshý joldary jóninde tıisti usynymdar joldanatyn bolady.
