Ashyq derekkóz
Ulttyq mýzeıde ótken kitaptyń saltanatty tusaýkeserine qaıratkerdiń úzeńgilesteri, Májilis depýtattary, BAQ ókilderi qatysty. Kitaptyń avtory Sanjar Kerimbaı О́zbekáli Jánibekovtiń mádenı maıdan jolyndaǵy janyn jalaý ete júrip atqarǵan, ulttyq qundylyqtarymyzdy qyzǵyshtaı qoryǵan sátterin ıyqtasa qyzmet etken qatarlastarynan, ókshebasar shákirtterinen arnaıy baryp jazyp alǵanyn aıtty.
«О́zbekáli Jánibekovtyń soqtyqpaly-soqpaqty ómirine tereńdeı boılap, «Taǵdyr taǵylymy» degen kitabyn oqydym. Biraq bul kitapta avtor orasan qatelik, kemshilik jibergen. Qazaq mádenıeti men rýhanııatyna ólsheýsiz úles qosyp, keńestik ıdeologııanyń qylyshy qylpyp turǵan táýmendi tar kezeńniń ózinde ulttyq qundylyǵymyzdy qyzǵyshtaı qoryǵanyn, basyn qalaı báıgege tikkeni týraly jazbaǵan. Onyń eń úlken qateligi osy. Keler urpaq О́zbekáli Jánibektiń Alash arystarynyń esimi qaıta atalyp, eńbegi halyqqa oralýyna, Naýryz meıramynyń jańǵyryp, jalpyhalyqtyq sıpat alýyn bilgeni jón. Tól mádenıetimizdiń órken jaıýyna sińirgen eńbegin, onda da mádenı maıdandaǵy qıdalasýlaryn oqyp bilsin degen táýekelmen osy kitapty qolǵa aldyq. Elimizdegi ár mekteptiń sóresinde turýy tıis kitaptyń jazylýyna sebepker bolyp, úlken amanatty arqalatqan – Qazaqstannyń Rýmynııadaǵy tótenshe jáne ókiletti elshisi qyzmetin atqarǵan Nurbah Rústemov. Osy azamat О́zbekáli Jánibekpen qanjyǵalasa qatar qyzmet atqarǵan tustastarymen, shákirtterimen dıdarlasýyma múmkindik týdyrdy», dedi Sanjar Kerimbaı.
Memleket jáne qoǵam qaıratkeriniń ónegeli ómir jolynda ultqa qyzmet etýdegi batyldyǵy men adaldyǵy qatar órile sıpattalatyn kitaptyń tusaýy О́zbekáli Jánibektiń ózi paıdalanǵan qaıshymen kesildi.
Kitap avtorlary Aıbek Nábı men Sanjar Kerimbaıǵa Senat Tóraǵasy Máýlen Áshimbaevtiń, Astana qalasynyń ákimi Jeńis Qasymbektiń quttyqtaý haty tapsyrylyp, syı-sııapat kórsetildi.
