Startaptardy bastapqy MCI (ıdeıa) jáne MVP (ónim) kezeńderinde qoldaýǵa baǵyttalǵan Startup Garage baǵdarlamasy 3 kezeńdi qamtıdy. Ár kezeńde komandalardyń qatysýy men áleýeti, olardyń is-sharalardaǵy belsendiligi jáne ónimdi ázirleýdegi jetistikteri muqııat taldanady.
– Nátıjesiz jáne erejelerdi buzǵan jobalar baǵdarlamadan shyǵarylady. Bul kópqyrly tásil bizge eń áleýetti jáne ambısııalyq jobalardy anyqtaýǵa múmkindik beredi. Qarqyndy 12 aptanyń ishinde startaptar jan-jaqty qoldaý men resýrstardy ǵana emes, sonymen qatar damý, ónimdi usyný, satý arnalaryn arttyrý jáne ınvestor tartý negizderin de ıgerdi, – deıdi Astana Hub bas dırektory Maǵjan Mádıev.
Jobany damytý úshin ár startaptyń qajettiligine qaraı ártúrli ádis qoldanylyp, túrli synaq jasalady. Startup Garage qatysýshylaryn IT kompanııalarda jumys istegen tájirıbeli jáne úzdik trekerler oqytty. Sarapshylar men shaqyrylǵan lektorlar, sonyń ishinde tabysty startaptardyń negizin qalaýshylar, ınvestorlar jáne IT salasyndaǵy iri oıynshylar startap qurý ári ony damytý boıynsha ınsaıttarymen bólisip, keńesterin aıtty. Inkýbasııa kezinde Quickstarter Plus, Best Price, DentaSense, ekgov, TenderTech, Inventivo, Cubus, Alan sekildi áleýetti jobalar jaqsy nátıje kórsetti.
– Úsh aıdyń ishinde baǵdarlama nátıjesinde ashyq naryqqa shyǵa aldyq, onda satylymymyz bir aıda 100 myń teńgeden 1,2 mln teńgege deıin, ıaǵnı 12 ese ósti. B2C júıesinde «Kaspı» kartasyna qarapaıym aýdarymnan bastap, «taza býhgalterlik esebi» bar, shot-faktýralarmen jáne sertıfıkattarmen qamtamasyz etilgen B2B júıesine aýysa aldyq. Jańa klıentterdi tabýdy úırenip qana qoımaı, naryqtaǵy usynysymyzdyń qundylyǵyn rastadyq. Qazir aýdıtorııamyz – 20 balabaqsha, – dep pikir bildirdi Best Price negizin qalaýshy Ilııas Tasymov.
Eske sala keteıik, MCI jáne MVP kezeńindegi startaptar Astana Hub-tyń Startup Garage ınkýbasııalyq baǵdarlamasy boıynsha tegin oqı alady. Bul baǵdarlama bilim berip qana qoımaı, qarqyndy damýǵa, sarapshylar jáne áleýetti ınvestorlarmen tıimdi qarym-qatynas ornatýǵa qolaıly jaǵdaı jasaıdy.
