Prezıdentke óńir ekonomıkasynyń birqatar salasynda oń nátıjeler bar ekeni týraly málimet berildi. Negizgi kapıtalǵa salynǵan ınvestısııa kólemi 530 mıllıard teńgege jetken. Onyń ishinde jeke ınvestısııa 435 mıllıard teńgeden asqan. 154 joba iske asyrylyp, 1,5 myń jumys orny ashylǵan.
Marat Ahmetjanovtyń aıtýynsha, sharýalardy qoldaý jáne qaıta óńdelgen ónim úlesin arttyrý sharalary turaqty túrde qabyldanyp jatyr. Jyl basynan beri ósimdik maıy, óńdelgen et, sút, maı, irimshik jáne súzbe sııaqty azyq-túlik túrlerin óndirý kórsetkishi ósken. Makınsk qus fabrıkasynyń 3-kezeńi iske qosyldy jáne «Aq-Dala Agro» jaýapkershiligi shekteýli seriktestiginiń óndiristik qýaty kezeń-kezeńimen artyp keledi. Bul oblystyń qus etin óndirý boıynsha elimizde kóshbasshy óńirlerdiń birine aınalýyna múmkindik berdi.
Kezdesýde jylytý maýsymynyń barysyna da erekshe nazar aýdaryldy. Oblys ákimi barlyq kommýnaldyq qyzmettiń jumysy qatań baqylaýǵa alynǵanyn, Kókshetaý jáne Stepnogorsk qalalaryndaǵy nysandardyń kezeń-kezeńimen jańǵyrtylǵanyn jetkizdi.
Budan bólek, Prezıdentke Kókshetaý qalasyn damytýǵa qatysty bas jospardyń jobasy ázirlengeni týraly aqparat berildi. Bul joba qalanyń ekologııalyq jáne ınfraqurylymdyq máselelerin sheshýdi kózdeıdi.
Sonymen qatar Memleket basshysyna halyqtyń turmysyn jaqsartýǵa jáne irgeles mıgrasııany tómendetýge yqpal etetin Aglomerasııany damytý jónindegi jańa keshendi jospardyń jobasy tanystyryldy.
Kezdesý sońynda Qasym-Jomart Toqaev óńirdi odan ári damytý, aýyl sharýashylyǵy ónimderin tereń óńdeý jobalaryn iske asyrý, ınvestısııa tartý, sondaı-aq Aqmola oblysynyń qalalaryn jylýmen úzdiksiz qamtamasyz etý jóninde birqatar tapsyrma berdi.
