Sóz basynda Májilis spıkeri, «Amanat» partııasynyń tóraǵasy Erlan Qoshanov ulttyq múddege saı keletin kitaptardy kóptep basyp shyǵarý máselesi árdaıym Memleket basshysy Qasym-Jomart Toqaevtyń nazarynda ekenin jáne memleket, partııa tarapynan mádenıetke, ádebıetke qoldan kelgenshe kómek kórsetile beretinin atap ótti.
«Ádebıettegi jas býyn úshin «Uly dala» baıqaýy aıtýly oqıǵaǵa aınaldy. Osy mańyzdy is-sharany jyl saıyn Táýelsizdik kúnine oraılastyryp ótkizemiz. О́ıtkeni ult táýelsizdiginiń rýhanı tiregi – onyń tili men ádebıeti, mádenıeti. Biz óz tarapymyzdan sizderdi qoldaýǵa árdaıym ázirmiz», dedi ol.
Erlan Qoshanovtyń pikirinshe, qazir qoǵamdyq keselge aınalǵan esirtki, lýdomanııanyń beleń alýy «rýhanı qalqannyń» bolmaýynan. Sondyqtan oqyrmanǵa osy zamannyń bolmysyn beıneleıtin tyń týyndylar, obrazdar men jańa keıipkerler kerek. Tóraǵa kitapsúıer qaýym jańa tolqyn qalamgerlerden salmaqty, maǵynaly dúnıeler kútip otyrǵanyn aıtty.
«Biz kitappen ómir súrdik. Ádebıet bizge moraldyq, rýhanı qalqan boldy. Al rýhanı qalqan degenimiz ne? Ol – jastardy, óskeleń urpaqty durys jolǵa baǵyttap, burys joldan saqtaıtyn qundylyqtarymyz. Buryn qoǵamdy kitap tárbıelese, qazir ınternet pen kóshe tárbıelep jatyr. Munyń joly – jas urpaqty otanshyldyqqa, izgilikke, adamgershilikke tárbıeleý. Al ol qundylyqtardyń bári – kitapta, ádebıette. Bul týraly Memleket basshysy da árdaıym aıtyp keledi», dedi partııa tóraǵasy.
Atalǵan baıqaý osymen tórtinshi ret ótkizilip otyr. Bıyl ádebı dodanyń oblystyq irikteýi uıymdastyrylyp, baıqaýǵa bas-aıaǵy 300-den astam shyǵarma kelip tústi. Onyń 170-i sheshýshi kezeńge joldama aldy.
«Uly dala» baıqaýyna «Ádebı syn» atalymyn engizý úlken jańalyq boldy. Jalpy, ádebı syn bolmaıynsha, ádebıet damymaıdy. Baıqaýǵa bir emes, birneshe materıal kelip tústi. Onyń bárin oı eleginen ótkizip, laıyqty baǵasyn berdik. Sondyqtan bul janrǵa keleshekte barynsha kóńil bólý kerek», dedi qazylar alqasynyń múshesi, ádebı synshy Amangeldi Keńshilikuly.
Sonymen «Poezııa» atalymy boıynsha birinshi oryndy Umtyl Zaryqqan, ekinshi oryndy Aızada Rahymjanova, úshinshi oryndy Erbol Alshynbaı ıelendi. Al «Proza» atalymynda birinshi orynǵa Baqytbek Qadyr, ekinshi orynǵa Saıan Seksenbaev, úshinshi orynǵa Mereı Qaınaruly laıyq dep tanyldy.
«Balalarǵa arnalǵan shyǵarma» atalymy boıynsha birinshi oryndy Nurbek Keńesbaı, ekinshi oryndy Abaı Orynbaı, úshinshi oryndy Aqmaral Omarova qanjyǵalady. «Dramatýrgııa» atalymynda birinshi oryndy Qanat Tileýhan, ekinshi oryndy Taıbek Abdýllın, úshinshi oryndy Qýat Qıyqbaı jeńip aldy.
«Ádebı syn» atalymy boıynsha birinshi oryn Birjan Ahmerge, ekinshi oryn Anar Abdýllınaǵa, úshinshi oryn Meıir Orazǵalıevke buıyrdy. Sonymen qatar «Alash amanaty» arnaıy syılyǵyn zertteýshi-ǵalym Baqtııar Báteý, «Maǵjan Jumabaevtyń 130 jyldyǵy» syılyǵyn aqyn, satırık Abylaı Maýdanov ıelendi.
«Uly dala» respýblıkalyq shyǵarmashylyq baıqaýy jeńimpazdarynyń qatarynda qos birdeı áriptesimiz bar ekenin aıta ketken jón. «Prozada» úzdik shyqqan Baqytbek Qadyr «Egemen Qazaqstan» gazeti áleýmet bóliminiń tilshisi bolsa, osy atalymynda úshtikke ilikken Mereı Qaınaruly – gazetimizdiń Shyǵys Qazaqstan oblysyndaǵy tilshisi.
