Brakonerler aıylyn jııar emes

Máselen, balyq sharýashyly­ǵy komıteti balyq resýrstaryn qor­­­ǵaý jáne balyq aýlaýdy ret­teý bas­­qarmasy­nyń basshysy Erasyl Sýyq­baevtyń aıtýynsha, Eko­logııa jáne tabıǵı resýrstar, ishki ister mı­nıstrlikteri men Ulttyq qaýip­siz­dik komıtetiniń shekara qyzmeti­men Jaıyq-Kaspıı sý aıdyndarynda 1 sá­­ýirden 31 mamyrǵa deıin birlese ót­ki­­zilgen aksııanyń maqsaty – bekire jáne basqa da balyq túrlerin saqtaý, ýyl­dyryq shashýy úshin qolaıly jaǵ­daıdy qamtamasyz etý. Kóktemgi aksııa kezinde Jaıyq-Kaspıı oblys­aralyq basseındik balyq sharýa­shylyǵy ınspeksııasynyń ınspektorlary tabıǵat zańnamasyn buzýdyń 972 deregin anyqtady. Zań talabyn buzǵan 669 adam ákimshilik jaýapkershilikke tartyldy.

«Brakonerlikke, sırek kezdesetin jáne joıylyp ketý qaýpi tóngen balyq túrleriniń zańsyz aınalymyna qatys­ty 36 qylmystyq is qozǵaldy. Osy­ǵan baılanysty quqyq buzýshylarǵa 15,5 mln teńgeden astam aıyppul salyndy. Zańsyz aınalymnan 68 tonna 300 keli balyq, onyń ishinde 1001 kg bekire tuqymdas baǵaly balyq túrleri alyndy. Bekireniń 29 kg qara ýyldyryǵy tárkilendi. 295 balyq quraly, 76 sý kóligi men 13 avtomashına tárkilendi», dedi E.Sýyqbaev.

Sol kezde Jaıyq ózeniniń arnasy men Kaspıı teńiziniń akvatorııasy tazartylyp, sý aıdyndarynan uzyndyǵy 74 shaqyrymnan asatyn 743 zańsyz balyq aýlaý quraly tabylǵan. Quqyq jáne tabıǵat qorǵaý organdary ásirese Atyraý oblysynyń Isataı, Jylyoı, Qurmanǵazy aýdandaryndaǵy, Damby baǵyty men «Aqjaıyq» memlekettik tabıǵı rezervaty sekildi krımıno­gen­dik aımaqtarǵa basa nazar aýdarǵan.

Atalǵan aksııanyń kúzgi kezeńi 10 qyrkúıek pen 31 qazan aralyǵyn­da ótti. Bul kezeńde de quqyq qor­ǵaý or­gan­darynyń «qorjyny» bos bolmady. Máselen, polısııa depar­tamenti uıymdasqan qylmysqa qarsy kúres basqarmasynyń qyzmetkerleri 17 qazanda bekire tuqymdas balyq­ty zańsyz satyp, tasymaldady degen kúdikpen 48 jastaǵy turǵyndy ustady. Tekserý kezinde kúdiktiniń Damby aýy­lyndaǵy turǵylyqty mekenjaıynan salmaǵy 96,3 kg quraıtyn 27 be­kire tuqymdas balyq tárkilendi.

Qurmanǵazy aýdanyndaǵy Sharon ózeninde «Býdarka» qaıyǵyn toqta­tylǵan. Tekserý kezinde qaıyqtan 18,5 kg bekire tuqymdas, 8,5 kg qara balyq, 2 ańshylyq qarý tabyldy. Qaıyqta Qurmanǵazy aýdanynyń 1965 jáne 1968 jylǵy turǵyndary bolǵan. Al 8 qarashada taǵy bir kúdiktiniń úıinen 282,5 kg quraıtyn bekire tuqymdas balyqtyń 76 danasy tabyldy. Kúdikke ilingen Atyraý qalasynyń 26 jastaǵy turǵyny tabıǵattyń baǵaly baılyǵyn satyp, zańsyz paıda tappaq bolǵany anyqtalyp otyr. Biraq bul áreketin iske asyra almady.

Bekire tuqymdas baǵaly balyq­tyń qoryna zańsyz qol suǵý deregi Mahambet aýdanynda da tirkeldi. Mun­da 30 jastaǵy júrgizýshiniń «Lada Kalina» kóliginen 56,6 kg bekire tár­ki­lendi. Ol baǵaly balyqty zańsyz satpaq bolǵan.

Jaıyq-Kaspıı oblysaralyq ba­lyq sharýashylyǵy basseındik ıns­pek­sııasynan málim etkendeı, ınspek­torlar reıdtik is-shara kezinde Jaıyq ózeniniń Qyzylbalyq aýyly mańyn­da «Baıda» júrdek qaıyǵyn qýyp jetken. Alaıda qaıyqtaǵylar zańsyz aýlanǵan balyqtar salynǵan eki qap­ty sýǵa laqtyryp ketken. Eki qaptyń birinen uzyndyǵy 90 metr kapron tory, ekinshisinen 12 kg 100 gramm bekire balyǵy tabylǵan.

Mine, osyndaı derekter bra­ko­nerliktiń tamyryna ońaılyqpen balta shabý ońaı emesin baıqatyp otyr. О́ıtkeni quqyq qorǵaý organdary­nyń ta­labyna baǵynbaı, zańsyz bekire ­aýlaıtyn» brakonerler aıylyn jımaı júr.

Atyraý oblysy