Elimizdiń túkpir-túkpirinen kelgen jýrnalıstıka salasynyń jas tolqyny men aǵa býyny Taldyqorǵan tórinde bas qosty. Oblys ákimdiginiń qoldaýymen ótken aladop saıysyna Beısen Quranbektiń otbasy, aǵaıyn-týysy, dos-jarany tegis jınaldy. Dástúrli túrde 9 jeltoqsan týǵan kúni qarsańynda ótetin shaǵyn fýtbol básekesine ár oblystan kelgen 8 komanda qatysty.
«Beısen aǵa tiri bolǵanda 52 jasqa tolatyn edi. Ol kisi dúnıe salǵannan keıin eske alý maqsatynda osyndaı is-sharany bastadyq. Jyl saıyn týrnırdiń deńgeıi ósip keledi. Oıynshylardyń da deńgeıi jaqsaryp jatyr. Fýtzalǵa qazaq jýrnalısteri tóselip qaldy dep aıtsaq bolady», deıdi týrnırdi uıymdastyrýshy Esbolat Aıdabosyn.
Osy jarysqa ákimdikten bólek, «Jetisý» telearnasy, «Jetisý» gazeti, Respublica partııasy, Janr ádebı klýby qoldaý kórsetken. Eki kún boıy Taldyqorǵandaǵy Súıinbaı atyndaǵy jastar sport saraıynda júldeli oryndardy sarapqa salǵan komandalar arasynan «Qaz365.kz» komandasy sýyrylyp alǵa shyǵyp, birinshi oryndy ıelendi.
Ekinshi oryn taldyqorǵandyq «Qareket» komandasyna buıyrsa, úshinshi oryndy «Almaty-Sánik» komandasy qanjyǵaǵa baılady. Al tórtinshi oryn «J-19» komandasyna buıyrdy.
Týrnırde úzdik óner kórsetken jekelegen oıynshylar da marapattaldy. Atap aıtsaq, jýrnalıst Nurtileý Imanǵalıuly atyndaǵy arnaıy júlde Araı Esenbekke, al Saıyn Tursynov atyndaǵy arnaıy júlde Jandos Aıtbaıulyna tabystaldy.
Jetisý oblysy
