Sýretti túsirgen – Erlan OMAR, «EQ»
Osylaısha, Almatynyń 2024 jylǵa arnalǵan bıýdjeti 1 trln 624 mlrd teńgeni qurady. Onyń ishinde aǵymdaǵy shyǵystarǵa bıýdjettiń 1 trln 110 mlrd teńgesi (68,4%) baǵyttalatyn bolady. Al qalanyń damý bıýdjeti 233 mlrd teńgeni (14,4%) quraıdy.
Erbolat Dosaevtyń aıtýynsha, qala bıýdjeti áleýmettik baǵytty saqtap, birinshi kezekte Almatynyń ortamerzimdi damýynyń negizgi baǵyttary boıynsha Prezıdent Qasym-Jomart Toqaevtyń tapsyrmalaryn iske asyrýǵa baǵdarlanǵan. Áleýmettik ınfraqurylymdy damytýǵa jáne jańǵyrtýǵa, bilim berý jáne densaýlyq saqtaý qyzmetteriniń qoljetimdiligi men sapasyn arttyrýǵa erekshe nazar aýdarylatyn bolady.
«Eger 2022 jyldyń aıaǵynda áleýmettik salanyń bıýdjeti 506,4 mlrd teńgeni qurasa, 2023 jyly ol 160 mlrd teńgege – aǵymdaǵy jyldyń qarasha aıynda 665 mlrd teńgege deıin ósti. 2024 jyly áleýmettik salaǵa 726 mlrd teńge bólý josparlanýda, bul Almaty qalasynyń bıýdjet shyǵystarynyń 44,7%–yn quraıdy», dedi Erbolat Dosaev.
Sonymen qatar 2023 jyl «Almaty qalasyn damytýdyń 2025 jylǵa deıingi baǵdarlamasyn jáne 2030 jylǵa deıingi ortamerzimdi perspektıvalaryn» iske asyrýdyń alǵashqy jyly boldy. Máselen, osy jyldyń 10 aıynda ekonomıkanyń serpindi ósýi qamtamasyz etildi, qysqamerzimdi ekonomıkalyq ındıkator 13,1%-ǵa ósti (elimiz boıynsha 1 oryn). Qala ekonomıkasyn damytýdaǵy oń dınamıka bıýdjet kiristeriniń 34,5%-ǵa – 4,9 trln teńgege deıin ósýin qamtamasyz etti, bul rette respýblıkalyq bıýdjetke ósim – 35,4%, al jergilikti bıýdjetke 32% qurady.
Budan bólek, depýtattar 1986 jylǵy jeltoqsan oqıǵasyna qatysýshylarǵa birjolǵy tólemdi 150 myńnan 250 myń teńgege deıin ulǵaıtýǵa daýys berdi. Osylaısha, qalada turatyn 670 «jeltoqsandyqtarǵa» bıyl Táýelsizdik kúnine oraı tólemder uıymdastyrylady.
Sessııa qorytyndysy boıynsha Almaty qalasy Din isteri basqarmasynyń qyzmetkerleri úshin eńbek jaǵdaılaryn jaqsartý, atap aıtqanda, laýazymdyq jalaqyny eki esege arttyratyn yntalandyrýshy ústemeaqylar ornatý bekitildi. Qyzmetkerlerdiń qazirgi eńbekaqysy 105 209 teńgeden 152 681 teńgege deıin (salyq shegerilgenge deıin) quraıdy.
ALMATY
