Otyrysta respýblıkanyń salyq jáne keden júıelerin jetildirý, farmasevtıka ónerkásibin, geologııalyq barlaý men agrarlyq ındýstrııany damytý, bızneske lısenzııa, nesıe berý jáne qoldaý kórsetý, eksporttyq-ımporttyq operasııalardy júrgizý kezinde júktemeni azaıtý, sondaı-aq basqa da birqatar másele egjeı-tegjeıli talqylandy.
Premer-mınıstr óz sózinde búgingi tańda Eýropalyq odaq Qazaqstannyń eń iri saýda jáne ınvestısııalyq seriktesi ekenin atap ótti. Eýropalyq ınvestısııalardyń jalpy kólemi 175 mlrd dollardan asty. Atap aıtqanda, 6 aıda EO elderi Qazaqstan ekonomıkasyna 5,2 mlrd ınvestısııa saldy.
«Qazaqstannyń syrtqy saýdasynda EO úlesi shamamen 30%-dy quraıdy. 10 aıda taýar aınalymy 34 mlrd dollardan asty. Bul kórsetkishter saýda-ekonomıkalyq yntymaqtastyqty arttyrýǵa negizdelgen júıeli baǵytymyzdy aıqyndaı túsedi», dedi Álıhan Smaıylov.
Úkimet basshysynyń aıtýynsha, búginde Qazaqstan ekonomıkasynyń túrli salalarynda 3 myńnan astam eýropalyq kompanııa tabysty jumys isteıdi, olardyń ishinde Shell, Eni, Air Liquide, Alstom, Claas sııaqty iri transulttyq korporasııalar bar.
«Aǵymdaǵy jyl ınvestısııalyq ózara is-qımyldy damytýda óte jemisti boldy. Ortaq pýl jańa iri jobalarmen tolyǵa túsýde. Buǵan Svevind kompanııasynyń jasyl sýtegi jobasyn iske asyrýy, Total kompanııasymen qýaty 1 GVt bolatyn jel parkin salý týraly kelisim, Knauf kompanııasynyń 4-gıpsokarton zaýytyn ashý jospary, sondaı-aq Scania kompanııasynyń kólik quraldarynyń iri quramdas bólshekterin qurastyrý jumystaryn iske qosýy jarqyn mysal bola alady», dedi Úkimet basshysy.
Onyń aıtýynsha, Qazaqstanda eýropalyq kompanııalar qatarynyń arta túsýi respýblıkanyń ınvestısııalyq tartymdylyǵynyń jaqsarǵanyn bildiredi.
Bıznes úshin qolaıly jaǵdaılar jasaý jáne ınvestısııalyq ahýaldy jaqsartý Úkimettiń basym mindetteriniń biri ekeni atap ótildi.
«Biz sapaly jáne uzaqmerzimdi ınvestısııalardy tartý úshin barynsha qolaıly jaǵdaılar jasaýǵa umtylamyz. Ol úshin eń úzdik álemdik standarttarǵa sáıkes ınvestısııalardy qoldaýdyń normatıvtik-quqyqtyq bazasy men quraldary turaqty negizde jetildirilip otyrady», dedi Álıhan Smaıylov.
Premer-mınıstr Qazaqstanda ESG standarttaryn eskere otyryp, Investısııalyq saıasattyń 2026 jylǵa deıingi tujyrymdamasy qabyldanǵanyn eske saldy. Jobalardy sapaly ınfraqurylymmen qamtamasyz etý úshin Ulttyq ınfraqurylymnyń 2029 jylǵa deıingi jospary ázirlenýde. Jańa Salyq kodeksi aıasynda ákimshilendirýdiń servıstik modeli engiziletin bolady.
«Investorlarǵa memlekettik qyzmetterdi alý jáne jobalardy sapaly júrgizý yńǵaıly bolýy úshin Ulttyq sıfrlyq ınvestısııalyq platforma ázirlenýde», dedi Á.Smaıylov.
Jalpy, Premer-mınıstrdiń aıtýynsha, el Úkimeti qolaıly ınvestısııalyq ahýal jasaýǵa baǵyttalǵan memlekettik saıasatty kezeń-kezeńmen jalǵastyrady.
