JAMBYLDA JAQSY ISTER KО́P

Keshe Premer-Mınıstr K.Másimovtiń oblystaǵy jumys sapary odan ári jalǵasyp, eń áýeli “Qazfosfat” mıneraldy tyńaıtqyshtar zaýytyna keldi. О́ıtkeni óńirdiń ekonomıkasy men áleýmettik júgin Jambyl fosfory kóterip turǵany aqı­qat. “Qazfosfat” JShS dep qara­paıym ǵana atalǵanymen, óte úlken bul qurylymnyń ishin­de “Qarataý” men Sholaqtaý taý-ken óńdeý keshenderi, Jańa Jam­byl fosfor zaýyty jáne “Mıneraldy tyńaıtqyshtar” fılıaldary bar. Elbasy Nur­sul­tan Nazarbaev oblysqa kezekti bir jumys sapary kezinde fosfor salasyna basa mán berip, “Jambyl – fosfordyń otany” degen bolatyn. Sondyqtan Úkimet basshy­sy­nyń óńir ekonomıkasynyń ty­nys-tirshiligin fosfor sa­la­sy­nan bastaýy oryndy. JShS-nyń bas dırektory M.Eskendirovtiń aıtýynsha, munda jylyna 650 myń tonna ónim shyǵaratyn kúkirt qyshqyly sehynyń qury­lysy qolǵa alynǵan. Ol kelesi jyly naýryz aıynda paıda­la­ný­ǵa berilmekshi. Jobanyń jalpy quny 12 mıllıard teńge bolsa, sonyń 4 mıllıardy zaýyttyń qarjysy. Investorlar, ıaǵnı HSBC, ATF bankteri men “Qaz­fosfat” JShS Premer-Mı­nıstr men oblys ákimi aldynda jobany qarjylandyrýǵa baı­lanysty úshjaqty memorandýmǵa qol qoıdy. Jambyldaǵy aıta júretin irgeli istiń biri – qus eti men ju­myrtqany tereńdete óńdeıtin et-jumyrtqa baǵytyndaǵy joǵary tehnologııalyq qus fabrıkasy­nyń qurylysy. Buǵan nemis kásip­kerleri de qyzyǵýshylyq tanytyp otyr. Joba quny – 6 mıllıard teńge. Nemister qus sharýashylyǵyna tán qaldyqtar men qoqystardy óńdep, kádege ja­ratatyn zaýyttyń da qury­lysyn qolǵa alamyz deıdi. Atap aıtsaq, ondaı qaldyqtardan je­ńil ári berik “karbon” dep atalatyn qurylys materıalyn jasaýǵa bolady eken. Úkimet basshysy bul jobanyń da qol qoıylýyna qatysyp, eki tarap kásipkerlerine sáttilik tiledi. Amangeldi gaz ken ornynyń ashylýy kezinde oblys jurt­shy­lyǵynyń eńsesin kótergeni ras. Endi, mine, sol gaz kenishiniń arqasynda taǵy bir zaýyt dúnıege ke­lip otyr. Ol – Amangeldi shıki munaı zaýyty. Munda jy­lyna 200 myń tonna munaı ónim­d­eri óndirilmek. Ol oblys dı­qan­da­rynyń arzan janar-jaǵarmaıǵa degen suranysyn óteıdi dep kútilýde. Oblys ákimi Q.Bozym­baevtyń aıtýynsha, elimizde sha­ǵyn munaı zaýyttary kóp bol­ǵa­ny­men, jam­byldyq nusqanyń aıy­rmashylyǵy – tolyq júıeli, ıaǵnı munda túpki ónimge qol jet­kizilmekshi. Oblystyń baıyrǵy turǵyn­da­ry armandaı áńgimelep otyratyn óndiris oryndarynyń biri – júndi alǵashqy óńdeý fabrıkasy edi. Ras, ol búginde keńes ókimeti ke­zin­degi bedelinen aıyrylǵan. De­genmen, Úkimet kóńil bólse, fabrıka basyndaǵylar qolǵa alsa, baıaǵy dúrildegen dáýirdi qaıta jasaýǵa bolǵandaı. О́ıtkeni munda tops óndirý jobasyn qolǵa alýǵa bolady. Ol qolǵa alynyp ta ketti. Qazir sol úshin qondyrǵylardy ret­ke keltirý jumystary júr­gizilýde. О́nim osy jyldyń shilde aıynda shyǵa bastamaqshy. Úkimet basshysy bul jumysqa da rıza­shylyǵyn bildirdi. El baılyǵy eń aldymen – ha­lyq. Sondyqtan Elbasy da, Úkimet te halyqtyń densaýlyǵyna, salamatty ómir saltyna joǵary mán berip keledi. Sondyqtan bolar, Úkimet basshysynyń kelesi atbasyn burǵan nysany – oblys­tyq qan quıý ortalyǵy boldy. Nysan ústimizdegi jyldyń jel­toq­san aıynda paıdalanýǵa beril­mekshi. Jańa qan quıý ortalyǵy batys pen shyǵystyń eń ozyq tehnologııasymen jabdyqtalmaq. Úkimet basshysy, sondaı-aq, oblystaǵy “Jol kartasy” aıa­synda qolǵa alynyp jatqan ju­mystarmen, Taraz metallýrgııalyq zaýyty, “Jasulan” JShS, “Qos­al­qy bólshekter” AQ, “Jambyl óndiristik sement kompanııasy” JShS jáne taǵy basqa da kom­panııalardyń jobalarymen de tanysty. Oblystaǵy jasóspirim­der qylmysy jónindegi keńeıtil­gen keńeske de qatysty. Taraz qalasyndaǵy kóp qabatty turǵyn úılerdiń aýlalaryndaǵy kórikten­dirý, kógerishtendirý jumystaryn da arnaıy baryp kórdi. Úkimet basshysy K.Másimov ob­lystaǵy memlekettik baǵdarla­ma­lar boıynsha atqarylýǵa tıisti tapsyrmalardyń barlyǵynyń da tııanaqty oryndalyp jatqanyna kóńili tolyp, óńirden rıza­shylyqpen attandy. Kósemáli SÁTIBAIULY, Jambyl oblysy.