Bul – Báıterek aýdanynda bıyldyqqa jańadan salynǵan ekinshi mektep. Taǵy tórt aýylda mektep qurylysy júrip jatyr. Munyń bári El Prezıdentiniń Joldaýyndaǵy apatty jaǵdaıdaǵy mektepterdi joıý jáne úsh aýysymdy mektepterdiń máselesin sheshý tapsyrmasyna sáıkes atqarylyp jatyr.
Jaıyq aýylynyń oqýshylary buǵan deıin kórshi aýylǵa baryp oqıtyn. Endi olar bıylǵy Táýelsizdik merekesin ómir boıy umytpaıdy. Sý jańa ǵımaratta 14 oqý kabıneti bar, onyń ishinde biriktirilgen hımııa-bıologııa, fızıka-matematıka, qazaq tili-orys tili, shetel tili, mýltımedııa, ınformatıka kabınetteri shákirtterdiń zamanǵa saı bilim alýyna sep bolmaq. Sonymen qatar mektep 2 sheberhanamen, sportzalmen, kitaphanamen, 70 oryndyq akt zalymen, 40 oryndyq ashanamen jabdyqtalǵan. Aýlada 2 oıyn, fýtbol, basketbol, júgirý jáne sport alańdary bar.
Jaqynda osyndaı jańa mektep Makarov aýyldyq okrýgindegi Sadovyı, Kóshim aýyldyq okrýgindegi О́rken aýyldarynda da ashylady.
Báıterek aýdanynda «Jaıly mektep» ulttyq jobasy aıasynda da bilim nysandary salynyp jatyr. Mysaly, Dostyq aýylynda 1 200 oryndyq, Baıqonys aýylynda 600 oryndyq mektep qurylysy júrip jatyr. Al 2024 jyly Baıqonys aýyldyq okrýginiń Volodar aýylynda 300 oryndyq, Darııan aýyldyq okrýginiń Ozernoe aýylynda 108 oryndyq mektep salý josparlanǵan.
Batys Qazaqstan oblysy
