Foto: Vedomstvo. Telegram
Azııa oıyndarynda kórkem gımnastıkadan el quramasy úzdik nátıje kórsetip, atalǵan doda aldyndaǵy mindettemelerin tolyq oryndaǵan, ıaǵnı 2 kúmis pen 1 qola medal jeńip alǵan. Olarǵa Azıadada jaqsy nátıje kórsetkeni úshin alǵys bildirgen Ermek Marjyqpaevtyń aıtýynsha, federasııa basshylyǵy Qytaıdaǵy jarys aldynda bir kúmis júlde alýdy josparlaǵanymen, kútkennen de joǵary nátıjege qol jetkizip, Azııa alamanynda el qorjynyna 3 medal saldy.
«Árıne, gımnastıkada tóreshilerdiń sýbektıvti baǵalaýy jıi kezdesetini bárine málim. Bizdiń sportshylardyń budan da jaqsy nátıje kórsetýine múmkindigi bolǵan edi. Alaıda bári biz oılaǵandaı bola bermeıdi. Sondyqtan halyqaralyq jarystarda jumys isteıtin otandas tóreshilerdiń sanyn arttyrý boıynsha jumysty kúsheıtý qajet», dedi mınıstr.
Al sporttyq gımnastıkadan elimizdiń erler quramasy Qytaıda 1 kúmis pen 1 qola josparlaǵanymen, bir qolany utty. Áıtse de, ulttyq qurama ókilderi jekeleı kópsaıysta Olımpıada joldamasyn jeńip alǵanyn aıta ketken jón. Qyzdar quramasy Hanchjoýda jeńis tuǵyrlarynan kórine almady.
Kezdesý sońynda vedomstvo basshysy sporttyq gımnastıka boıynsha erler men qyzdar quramasynyń daıyndyq jumystaryn qaıta qaraýdy tapsyrdy. Sporttyń atalǵan túrinen ulttyq qurama ókilderiniń sońǵy jyldardaǵy nátıjeleri sportshylardy jańa júıe boıynsha jattyqtyrýdy qajet etedi.
