- Astanadaǵy Beeline Arena kesheninde kásipqoı bokstan «IBA-nyń chempıondar túni» dep atalatyn halyqaralyq týrnır uıymdastyryldy. Atalǵan jarysta qazaqtyń jýan judyryqty jigitterimen qatar, alys-jaqyn shet memleketterden kelgen birqatar tanymal bylǵary qolǵap sheberi kúsh synasty. Bul básekelerde Sanjar Táshkenbaı (51 kg) ózbekstandyq Nodırjon Myrzaahmedovten, Danııar Eleýsinov (71 kg) Ońtústik Afrıka Respýblıkasynyń ókili Djabýlanı Makhenseden, Bekzad Nurdáýletov (80 kg) reseılik Nıkıta Zonnan basym tússe, Serik Temirjanov (63,5 kg) serbııalyq Pavel Fedorovqa, Dýlat Bekbaýov (67 kg) Reseıdiń taǵy bir boksshysy Harıton Agrabaǵa, Aslanbek Shymbergenov (71 kg) meksıkalyq Hose Mıgel Borregoǵa jáne Erasyl Jaqpekov (80 kg) nıderlandtyq Gradýs Kraýsqa ese jiberdi.
- Reseıdiń Ekaterınbýrg qalasynda ótken RCC 17 týrnırinde aýyr salmaqta aıqasatyn qazaqtyń aralas jekpe-jek sheberi Asyljan Baqytjanuly kezinde UFC-de baq synaǵan reseılik Maksım Grıshınmen sheberlik baıqasty. Bul báseke qandasymyzdyń basymdyǵymen ótti. Qarsylasyna qaraǵanda «Saq» óte saýatty qımyldap, soqqysyn da kóbirek darytty. Biraq ádildikti belden basqan tóreshiler jergilikti sportshynyń qolyn kóterdi.
- Short-trekten Ońtústik Koreıanyń astanasy Seýlde shymyldyǵy túrilgen álem kýbogi kezeńdik saıysynda Denıs Nıkısha 500 metrlik qashyqtyqty 41.196 sekýndta júgirip ótip, qola medal ıelendi. Ol tek qytaılyq Shaoan Lıý (41.196) men ońtústikkoreıalyq I-Ra Sıogeden (41.205) qalyp qoıdy.
- Shaıbaly hokkeıden Qazaqstannyń jastar quramasy 2025 jyly ótetin álem birinshiliginiń irikteý týrnırindegi sońǵy kezdesýde Aýstrııadan býllıt soǵý barysynda utyldy. Biraq bul jaǵdaı jarys kestesine aıtarlyqtaı áser ete qoımady. Sebebi osyǵan deıin jerlesterimiz tórt kezdesýdiń barlyǵynda jeńiske jetip, negizgi jarystyń joldamasyna kúni buryn ıelik etken edi. Taǵy bir aıta keterlik jaıt, osy týrnırdiń qorytyndysy boıynsha Vladımır Nıkıtın eń úzdik qaqpashy bolyp tanyldy. Ol óz qaqpasyna baǵyttalǵan soqqylardyń 64,44 paıyzyn keri qaıtaryp, 119 ret seıv jasady.
- Aralas jekpe-jekten AQSh-tyń Las-Vegas qalasynda uıymdastyrylǵan UFC 296 týrnırinde áli de jeńilistiń kermek dámin tatyp kórmegen jartylaı orta salmaqtaǵy Shavqat Rahmonov 40 jastaǵy saqa sportshy Stıven Tompsonmen tóbelesti. Jergilikti faıter bizdiń jigitke jarytyp qarsylyq kórsete almady. Básekeniń basynan tizgindi qolyna alǵan Shavqat ekinshi kezeń aıaqtalýyna sanaýly sekýndtar qalǵanda Stıvendi qylqyndyryp tastady. Bul – 29 jastaǵy qazaqtyń qaısar ulynyń oktagondaǵy 18-jeńisi!
- Bokstan álem chempıonatynyń qola júldegeri Tursynbaı Qulahmet kásipqoı rıngtegi óziniń kezekti jekpe-jegin Ulybrıtanııanyń Sanderlend qalasynda ótkizdi. Bul básekede orta salmaqtaǵy Syr boıynyń sańlaǵy fransııalyq Fýad El Massýdıdi upaı sanymen utty.
- Sankt-Peterbýrgte shaıbaly hokkeıden «Birinsha arna kýbogi» jolyndaǵy jarys óz máresine jetti. Tusaýkeser kezdesýde Belarýsten (2:6) utylǵan otandastarymyz kelesi matchta JHL-dyń juldyzdarynan (3:1) basym tústi. Biraq sońǵy oıynda Reseı-25 komandasyna (2:5) ese jiberdi. Nátıjesinde, Qazaqstannyń hokkeıshileri úshinshi oryndy enshiledi.
