Qundy eńbek 3 bólimnen, 22 ǵalymnyń zertteý jumysynan turady. Taǵylymy mol jınaqtan M.Júsipov, T.Jurtbaı, D.Ysqaquly, D.Álkebaeva, Ǵ.Baıtileýova, O.Jubaı, S.Júsip, A.Salqynbaı, taǵy da basqa avtorlardyń zertteýin kezdestirýge bolady.
Kitaptyń negizgi maqsaty – Alash qaıratkerleriniń ozyq ıdeıalaryn alys-jaqyn shetelderge de tanytyp, ómirsheń qazynaǵa aınaldyrý. Kitapta Alash zııalylarynyń oqý-aǵartý, bilim, tárbıe jáne mádenıet máseleleri boıynsha qaldyrǵan muralaryn shetel ǵalymdarynyń týyndylarymen salystyra otyryp taldanǵan ǵylymı maqalalar toptastyrylǵan.
«Ýnıversıtet – Alash azamattaryn tárbıeleıtin jer. Al Alashtyń arystary únemi halyqtyń saýatyn ashýǵa tyrysqany aqıqat. Sol sebepti búgin júregi qazaq dep soǵatyn ár azamattan súıinshi suraımyn! Biz AlmaU-dyń 35 jyldyq mereıtoıyna arnap «Alash qaıratkerleriniń ozyq ıdeıalary» atty ǵylymı jınaqty daıyndadyq. Alash ıdeıasy – HH ǵasyr basyndaǵy qazaqtyń ulttyq-memlekettik ıdeıasy, jańashyldyq pen jasampazdyqtyń kóshbasshysy boldy. Alash múddesi men ıdeıasyna adaldyq qashan da Qazaqstannyń saıası, rýhanı órkendeýi men óristeýiniń barometri bolyp qalmaq. Alashordanyń dúnıege kelgen kúnimen Almaty menedjment ýnıversıtetiniń týǵan kúniniń sáıkes kelýi bizge úlken mindetter júkteıdi. Sondyqtan da biz Alash qaıratkerleri men olardyń uly isterin zerttep, nasıhattaýdy ári qaraı jalǵastyrmaqpyz. Aǵylshyn tiline aýdaryp, búkil álemge taratý jospary oıymyzda. Osylaısha, Alash zııalylarynyń qaıratkerlik jolyn halyqaralyq ǵylymı qaýymdastyqqa tanytýdy kózdeımiz», dep atap ótti Almaty management university prezıdenti Asylbek Qojahmetov.
Uıymdastyrý komıtetiniń múshesi, fılologııa ǵylymdarynyń doktory Meńdigúl Shyńdalıeva jobaǵa elimizdiń 5 qalasynan 10 joǵary oqý ornynyń mamandary qatysqanyn aıtady.
«Alash zııalylarynyń eńbekterin oqyp otyryp, olardyń Ejelgi Rım, Grekııa, Úndistan men Qytaı oıshyldary murasymen etene tanys bolǵanyn, sol ulylardyń danalyqtaryna qanyq bolǵanyna kóz jetkizemiz. Bizdiń baıqaǵanymyz, Alash qundylyqtary Mahatma Gandı, Martın Lıýter Kıng, Mustafa Kemaldyń kúres jolyndaǵy úndeýlerimen, ustanymdarymen ushtasyp, álemdik saıası oqıǵalarmen tyǵyz baılanysqan», deıdi ǵalym.
ALMATY
