Investısııa • 21 Jeltoqsan, 2023

Iske asyrylatyn ınvestısııalyq jobalar

140 ret

kórsetildi

2 mın

oqý úshin

Premer-mınıstrdiń birinshi orynbasary Roman Sklıardyń tóraǵalyǵymen Investısııalardy tartý jónindegi keńestiń (Investısııalyq shtab) kezekti otyrysy ótti.

Egemen Qazaqstan

Qatysýshylar azamattardyń Qazaqstannyń jer qory týraly aqparatqa tolyq qoljetimdiligin qamtamasyz etý úshin qurylǵan «Jyljymaıtyn múliktiń biryńǵaı memlekettik kadastry» (JMBMK) júıesin jetildirý máselelerin talqylady. Júıe aıasynda jer ýchaskelerin berýdiń barlyq úderisi elektrondyq formatqa aýystyryldy. Búgingi tańda JMBMK arqyly 1 mln-nan astam qyzmet kórsetildi, 238 myń kadastrlyq pasport berildi.

Júıeniń eldiń ınvestısııalyq tartymdylyǵyn arttyrýda mańyzdy ról atqaratyny atap ótildi. Osyǵan baılanysty ortalyq jáne jergilikti atqarýshy organdarǵa JMBMK-ny qajetti aqparatpen sapaly túrde ýaqytyly toltyryp otyrý tapsyryldy. Ulttyq ekonomıka mınıstrligi monopolıster tarapynan JMBMK-ge durys ári senimdi málimetter berý úderisin baqylaýǵa alýy kerek.

Sonymen qatar otyrysta arnaıy ekonomıkalyq aımaqtardy damytý máseleleri talqylandy. Roman Sklıardyń aıtýynsha, olardyń áleýeti áli tolyq ashylmaǵan. Atap aıtqanda, jańa jobalardy tartý úshin qajetti ınfraqurylymdy júrgizý boıynsha jumysty jandandyrý kerek. Memlekettik organdarǵa naqty sheshimder daıyndaý tapsyryldy.

Oǵan qosa Investısııalyq shtab otyrysynda eki iri ınvestısııalyq jobany iske asyrý barysy qaraldy.

Shyǵys Qazaqstan oblysynda «Qyzylqaıyń» ken ornyna jaqyn jerde jylyna 25 mln tonna ónim shyǵaratyn baıytý kombınaty salynatyn bolady. Aldyn ala baǵalaý boıynsha jobanyń quny 216 mlrd teńgeden aspaq. 4 500-ge jýyq jumys ornyn qurý josparlanyp otyr. Bul óz kezeginde oblystyń ekonomıkalyq áleýetin damytýǵa mýltıplıkatıvti áser beredi.

Túrkistan oblysyndaǵy О́gem ózeninde sý elektr stansasynyń qubyryn salý jónindegi ınvestısııalyq joba erekshe strategııalyq mańyzy bar sý sharýashylyǵy nysandarynyń tizbesine engizilgen. Jobanyń qýaty – jylyna 110 mln m³ aýyz sý jáne 72 MVt/saǵ. elektr energııasy. Ony iske asyrý óńirde energııa óndirýdi ulǵaıtýǵa, sondaı-aq 1 mln-nan astam turǵyndy sýmen qamtamasyz etýge múmkindik beredi.

Memlekettik jáne jergilikti atqarýshy organdarǵa osy ınvestısııalyq jobalardy iske asyrý boıynsha problemalyq máselelerdi qysqamerzimde sheshý tapsyryldy.