Dýlat Tastekeıdi kópshilik qazaq tiliniń janashyry retinde tanıdy. Ol ózi basqaratyn kompanııada qyzmetkerlerdiń qazaq tilinde sóıleýin talap etip, is-qaǵazdardy qazaqshalaǵan.
«Men el Prezıdenti Qasym-Jomart Kemelulynyń bastamasyn qoldap, jańadan qurylǵan Qazaq Tili Endowment qoryna ASSYLTAS qoǵamdyq qorynan 100 mln teńge aýdaratynymdy habarlaımyn. Qazaqtyń birtýar aqyny Maǵjan Jumabaev: «Ultqa tilinen qymbat nárse bolmaq emes, bir ulttyń tilinde sol ulttyń syry, tarıhy, turmys-tirshiligi, minezi aıqyn kórinip turady», degen. Demek qaı salada qyzmet etsek te, qandaı tildi úırensek te bizdiń basty baılyǵymyz qazaq tili bolmaq. Qazaq tili ólmeıdi, máńgi jasaıdy», dedi Dýlat Tastekeı.
Bul qordyń basty mindeti – memlekettik tildi qoldaý jáne damytýmen aınalysatyn elimizdegi eń iri uıym – «Qazaq tili» qoǵamynyń turaqty ári uzaqmerzimdi damýyn qamtamasyz etý.
Endaýment qorynyń ereksheligi – qorǵa jınalǵan qarjy jumsalmaıdy. Qordaǵy qarajat basqarýǵa beriledi jáne ınvestısııaǵa quıylady. Investısııalyq qyzmetinen túsken tabys «Qazaq tili» qoǵamynyń jarǵylyq mindetterine jumsalady.
QAZAQ TILI Endowment qoryn bedeldi qoǵam qaıratkerleri, ǵalym-lıngvıster men memleket ókilderinen quralǵan táýelsiz qamqorshylar keńesi baqylaıdy.
Aıta keteıik, 7 jeltoqsanda eń alǵashqy bolyp atalǵan qorǵa jeke qarajatynan Qazaqstan Prezıdenti Qasym-Jomart Toqaev 7 mln teńge aýdarǵan bolatyn.
