Táýelsizdik kúnine oraılastyrylǵan konsertti Atyraý oblysy ákimdiginiń qoldaýymen Qazaqstan Respýblıkasynyń Majarstandaǵy elshiligi uıymdastyrdy. Elshi Jánibek Ábdirashovtyń aıtýynsha, eki el arasyndaǵy yntymaqtastyqty, mádenı baılanysty nyǵaıtý kózdelgen.
Konserttik zal sahnasynda orkestr ujymy qazaq jáne álem klassıkteri – Qurmanǵazy Saǵyrbaıuly, Dına Nurpeıisova, Jaıaý Musa, Ahmet Jubanov, Nurǵısa Tilendıev, Evgenıı Brýsılovskıı, sondaı-aq Iogan Shtraýstyń shyǵarmalaryn oryndady. Majar kórermenderi qazaqtyń ulttyq aspaptarynan tógilgen sıqyrly sazdy tyńdap, baı shyǵarmashylyq repertýarǵa yqylasyn bildirdi. Ásirese «Balbyraýyn», «Adaı» kúıleri men «Qorqyt» kompozısııasy erekshe qyzyqtyrdy. Jergilikti kórermen Iogannes Bramstyń «Majar bıleri №5» kompozısııasyn tosyn syı retinde qabyldady.
«Áýen men ándi tyńdaǵanda erekshe sezim paıda boldy. Halyq mýzykasy árqashan kóne zamannan kele jatqan oqıǵalardy beıneleıdi. Kóshpeli halyqtardy dúnıege ákelgen uly dalanyń mýzykalyq murasyn estidik. Qazaq jaratylysynan óte daryndy, mádenıeti baı, ádemi daýysy bar halyq eken», dep pikir bildirdi majarlyq kórermenniń biri.
Kórermendi «Kúı tartystyń» energetıkasy dúr silkindirdi. Kúıshilerdiń oryndaý sheberligi men dombyranyń qýatty únine yqylaspen qol soqty.
Atyraý oblysy
