FOTO: someplace.kz
Birer kún buryn aımaqtyń týrızmin damytýǵa úles qosyp júrgen «Býrabaı Damý» seriktestigimen qosa «Visit Aqmola» týrıstik aqparattyq ortalyǵynyń mamandary bastap, bir top jýrnalıst Býrabaıdaǵy qys maýsymyn tamashaladyq.
«Býrabaı Damý» seriktestigi – Prezıdent Is basqarmasyna qarasty kompanııa. Segiz jyldan beri Shýchınsk – Býrabaı kýrorttyq aımaǵyndaǵy týrızmdi damytý mindetin jemisti atqaryp keledi. Demalys ornyndaǵy nysandardy kútip ustap, sapaly qyzmet kórsetedi.
Sapar barysynda aýdan ortalyǵynan shamamen 10 shaqyrym qashyq jatqan Prezıdent Is basqarmasy «Býrabaı» ulttyq parkiniń maral ósiretin sharýashylyǵyna aıaldadyq. Munda múıizi men súti myń da bir syrqatqa em maral sharýashylyǵynyń tynys-tirshiligi kópti qyzyqtyrady. Sharýashylyqtaǵy mamandardyń aıtýynsha, osy mańdy mekendeıtin maraldyń tarǵyl buǵy tuqymdasy Qyzyl kitapqa engen. Ormanshylar júrisi qıyndap, qaljyraǵan maraldy toptan bólip, emdeıdi. Búginde sharýashylyqta 200 bas shamasynda maral bar. Olar 600 gektar aýmaqty alyp jatqan qalyń orman alqabyn mekendeıdi. Osy mańdaǵy Pantoterapııa ortalyǵynda shıpaly dári-dármektiń nebir túri jasalady eken.
«Býrabaı» memlekettik ulttyq parkine qarasty 10 orman sharýashylyǵy bar bolsa, biz sonyń ishindegi «Mırnyı» orman sharýashylyǵyna aıaldadyq. Onda 30 jyldyq tájirıbesi bar ormanshy Baýyrjan Muqanov bastaǵan birneshe jumysshy buǵy, elik syndy ańdardyń azyǵyn qamdap júr eken. Iá, orman sharýashylyǵynda Qyzyl kitapqa engen ósimdikter joıylyp ketýdiń az-aq aldynda turǵan ań-qusty qorǵaý – ońaı sharýa emes. О́ıtkeni qasqyr sekildi jyrtqysh ańdar shamadan tys kóbeıse, ózge janýarlardyń sanyn kúrt azaıtýy múmkin ǵoı. «Mırnyı» orman sharýashylyǵynyń aýmaǵy 18 394 gektar bolsa, ár gektarda bir-bir astaýdan qoıylǵan.
Qysqy shóbin bastyrmalarda jıyp daıyndaǵan ormanshylarǵa tabys tilep, kýrorttyq aımaqtaǵy «Qazaqstan Laplandııasyna» aıańdadyq. Qys maýsymynda Aıaz ata rezıdensııasynyń aýmaǵyna kelgen úlken-kishilerge buǵy, haskı ıtterin jekken shanamen, atshanamen serýendeýge bolady. Ertegilerde kezdesetin baqsynyń da úıi – osy mańda. Zaý bıikten shanamen zýlap, konkı, shańǵy tebýge kelgenderge jaǵdaı jasalǵan. Bul mańda qarda júretin kólikter de júıitkıdi. Eń bastysy, qyzmet kórsetý sapasy jaqsarǵan.
Aqmola oblysy burynnan týrızmge taptyrmaıtyn óńirlerdiń biri sanalady. О́tken 8 aı boıynsha aıtar bolsaq, oblys aýmaǵyna kelgen týrısterdiń sany shamamen 956,7 myńǵa jetken. Onyń ishinde 17,2 myń qonaq kýrortty aýmaqqa demalýǵa kelse, Memlekettik ulttyq parkke 535,3 myń adam aıaldaǵan. Jyl sońyna deıin týrıster sany 1,2 mıllıonnan asady degen boljam da bar. Onyń ishinde el azamattarynyń úlesi – 940,8 myń adam shamasynda. Al qańtar-qyrkúıek aralyǵynda kýrorttyq aımaqqa 15 838 sheteldik týrıst kelgen. Endi jaqyn beride Aqmola oblysynyń týrızm basqarmasy «Visit Aqmola» týrıstik aqparattyq ortalyǵymen birlesip Býrabaıda «Muz qalashyǵy» festıvalin ótkizýge nıettenip otyr eken. Biz dástúrli is-shara aımaqqa týrısterdi tartýdyń taǵy bir sátti qadamy dep túıdik.
Aqmola oblysy
