24.kz saıtynyń málimetinshe, Rýslan Qaırambaevtyń Koreıaǵa kelgenine bir aıdan asqan. Elshilik qyzmetkeri sol kúni demalysta edi. Biraq shuǵyl sharýa shyǵyp, elshilikke asyǵady. Sol-aq eken, janyp jatqan kólikti baıqaıdy. Rýslan Qaırambaev oılanbastan órtti sóndirýge umtylady. Shuǵyl árekettiń arqasynda qyzyl jalyndy aýyzdyqtaıdy.
Turaqtan órtenip jatqan kóliktiń shyǵyp kele jatqanyn kórdik. Aldymen birinshi hatshy Baıtileýov Baýyrjan kórdi. Men órt sóndirgishti alyp shyǵyp, órtti sóndirýge kiristim, - deıdi Qazaqstannyń Koreıadaǵy elshiliginiń qyzmetkeri Rýslan Qaırambaev.
О́rt Seýldegi ǵımarattardyń birinde bolǵan. Júrgizýshi jeńil kóligimen jerasty turaǵynan shyqqan kezde qyzyl jalyn burq etedi.
Rýslannyń erligin jergilikti buqaralyq aqparat quraldary jarysa jazdy. Ionsan móltek aýdanynyń ákimdigi alǵys hatpen marapattady.
