Jyl toǵysynda Jańaqorǵan, Shıeli aýdandaryndaǵy 5 eldi mekenge tabıǵı gaz jetip, turǵyndar qýanyshy eselene tústi. Qos aýdanǵa jasaǵan saparynda oblys ákimi Nurlybek Nálibaev Shıelidegi Eńbekshi, Jıdeliaryq aýyldarynda uıymdastyrylǵan saltanatqa qatysty.
Bıyl aýdandaǵy 40 myńnan asa turǵyn tabıǵı gaz tutynýǵa qol jetkizipti. Aýdandaǵy 6 eldi mekenge gaz taratý jelilerin ornatý úshin respýblıkalyq bıýdjetten 1,5 mlrd teńge bólinip, biraz jumys atqarylǵan. Keler jylǵa qaralyp otyrǵan 4 mlrd teńgege 12 eldi mekendi gazben qamtamasyz etý josparda tur. Osylaısha, 2024 jyldyń sońynda oblysty gazdandyrý deńgeıi 78 paıyzǵa jetpek.
Aýyldaǵylar qýanyshyna oraı uıymdastyrylǵan is-sharada «Aýyl – el besigi» ulttyq jobasy aıasynda gaz júrgizýge úles qosqan azamattar men aýdan ardagerleri marapat tórinen kórindi.
Jańa jylǵa sanaýly kúnder qalǵan osy bir sátti Talaptan aýyldyq okrýgi turǵyndary da kópke deıin umyta qoımas. Olaı deıtinimiz, osy kúni bul aýyldyq okrýgte dárigerlik ambýlatorııa qoldanysqa berildi. Oblystaǵy beldi kompanııanyń biri – «Baq-Bereke» JShS salǵan ambýlatorııa ǵımaraty jeke bý qazandyǵy arqyly dızel otynymen jylytylady. Turǵyndar barlyq qajetti jabdyǵy jetkilikti jańa nysannyń yńǵaıly, sapaly salynǵanyna rızashylyqtaryn bildirdi. Osy kúni dál osyndaı ambýlatorııa aýdandaǵy Aqtoǵan aýyldyq okrýginde de ashyldy.
Bıyl kóktemde Shıelimen aýyly aralas Jańaqorǵan aýdanyndaǵy Birlik, Qyrash eldi mekenderine «kógildir otyn» jetip, Qarataýdyń etegindegi qos aýyldyń qýanyshyna kýá bolǵanbyz.
Al osy dúısenbi kúni aýdandaǵy Jaıylma, Shalqııa, Quttyqoja aýyldarynyń turǵyndary úılerine tartylǵan tabıǵı gazdy alǵash ret tutatty. Keler jyly osy aýdandaǵy Keıden, Tómenaryq eldi mekenderi turǵyndary da «kógildir otyn» ıgiligin kóre bastaıdy.
Sapar aıasynda oblys ákimi Jańaqorǵan aýdanynyń О́zgent aýyldyq okrýgindegi 150 oryndyq klýbtyń ashylý saltanatyna da qatysty.
– Memleket basshysy aýyl jaǵdaıyn jaqsartýǵa basa mán berip keledi. Memlekettiń aýyldyq aýmaqtardy damytýdyń 2023-2027 jyldarǵa arnalǵan tujyrymdamasyna sáıkes mádenıet salasyn órkendetýge qajetti jaǵdaılar jasalyp ta jatyr. О́rkenıetti ult, eń aldymen, tarıhymen, ónerimen, álemdik mádenıettiń altyn qoryna qosqan úlesimen baǵalanady. Elimizdiń, týǵan jerimizdiń atyn álemge tanytyp júrgen talaı ónerpazdar aýyldan shyqqan. Sondyqtan mádenıet úılerin, klýbtardy búgingi zamannyń suranysyna saı etý asa mańyzdy. Búgin esigin aıqara ashqan 150 oryndyq jańa mádenıet oshaǵy óskeleń urpaqty ónerge baýlý ortalyǵyna aınalady dep senemin, – dedi aımaq basshysy.
Aýyldaǵylardyń qýanyshyna ortaqtasqan qoǵam qaıratkeri, qarjy salasynyń ardageri Qalqazbek Ájibekov jerlesterin quttyqtap, aýyl ardageri Qudaıbergen Bazarbaev bata berdi.
Bıyl oblysta 150 oryndyq tórt klýb salynyp paıdalanýǵa berildi. Aqjol aýylynda sport kesheni, Jaıylmada 150 oryndyq klýb ashylsa, Qyzylorda qalasynda otbasylyq qundylyqtar men salt-dástúrdi dáripteıtin «Anaǵa taǵzym», «Otbasy» ortalyqtary jumysyn bastady. Oblys ortalyǵyndaǵy 1000 oryndyq «О́ner» ortalyǵynyń qurylysy jýyrda aıaqtalyp, paıdalanýǵa berilmek. Keler jyly 7 aýdanda saltanat saraıy, kitaphana, mýzeı, arhıv jáne jastar, ardagerler men analar bas qosatyn «Rýhanııat» ortalyqtary salyna bastaıdy.
Qyzylorda oblysy
