Sýretterdi túsirgen – Jumabaı Musabekov
«О́tip bara jatqan jyl elimiz úshin Memleket basshysy bastaǵan aýqymdy ózgeristerdiń taǵy bir jańa belesin baǵyndyrǵan tarıhı ýaqyt boldy. Sonyń ishinde, mádenıet pen ıdeologııa salasynda aýqymdy bastamalar qolǵa alynyp, «Ádiletti Qazaqstan» tujyrymdamasynyń is júzindegi tuǵyry aıqyndala bastady. Prezıdent bastamalary salamyzǵa da tyń serpilis berdi. Qalyptasqan rýhanı, aqparattyq jaǵdaıǵa tikeleı áser etetin birqatar mańyzdy ári qajetti zań men normatıvtik akti qabyldandy. Qoǵamnyń ıntellektýaldyq, shyǵarmashylyq, zaıyrly ortasyn kótermeleý maqsatynda Prezıdent tarapynan naqty qadamdar jasalyp, zor motıvasııalyq qoldaý kórsetildi», degen Aıda Ǵalymqyzy budan ári mınıstrliktiń osy jyl ishinde atqarǵan jumystaryn tarqatyp aıtty.
«Mınıstrliktiń aqparattyq jumysy medıasalany damytý boıynsha jaǵdaı jasaý, el halqyn memlekettik saıasatty iske asyrý týraly habardar etý jáne aqparattyq qaýipsizdikti qamtamasyz etý sııaqty úsh negizgi quramdas bólikten turady. Osy jyldyń naýryz aıynda Memleket basshysynyń Jarlyǵymen sóz bostandyǵyn odan ári qamtamasyz etýge, otandyq medıasalanyń básekege qabilettiligin arttyrýǵa, aqparattyq egemendikti nyǵaıtýǵa baǵyttalǵan «Aqparattyq doktrına» bekitildi. Al tamyz aıynda Úkimettiń qaýlysymen ony iske asyrýǵa baǵyttalǵan is jospary qabyldandy. Doktrınadan týyndaıtyn asa mańyzdy zań jobalarynyń biri – mınıstrliktiń bastamasymen júzege asqan «Mass-medıa týraly» zań jobasy», dedi A.Balaeva.
Budan ári mınıstr «Onlaın platforma jáne onlaın jarnama týraly» zańǵa, memelekettik aqparattyq saıasatty júzege asyrý aıasynda atqarylǵan jumystarǵa toqtaldy.
Mınıstrlik jumysynyń kelesi bir baǵyty – mádenıet salasyna keńinen toqtalǵan sala basshysy óz sózinde Almaty oblysynyń kóz tundyrar taý-tasy men ózen-kóli kınoındýstrııasyn damytýǵa taptyrmas qolaıly óńir ekenin erekshe atap ótti.
«Prezıdent 1 qyrkúıekte elimizdiń áleýmettik-ekonomıkalyq damýyna, nátıjesinde otandastarymyzdyń ómir súrý deńgeıin arttyrýǵa arnalǵan reformalardyń jańa paketin usyndy. Oń ózgeristerdiń mańyzdy sharty – azamattyq qoǵamnyń belsendi qatysýy. Almaty oblysynyń azamattyq qoǵam ókilderi únemi belsendilik tanytyp, qoǵamdyq-saıası úderisterge beıjaı qaramaıtyny qýantady», dep atap ótti Aıda Balaeva.
О́ńirde jumys isteıtin 600-den asa ÚEU jáne 36 iri volonterlik uıym áleýmettik mańyzdy jumystarmen, sonyń ishinde aýyldyq deńgeıde de belsendi aınalysady.
«Kreatıvti ındýstrııa salasyn damytý, eń aldymen, jastar úshin jańa, tabysy joǵary, qoljetimdi jumys oryndaryn ashýǵa múmkindik beredi. Sondaı-aq múmkindigi shekteýli jandar men shalǵaı eldi mekende turatyn azamattardyń ózin-ózi qamtamasyz etý úshin tıimdi salaǵa aınalady. Olar otandyq mádenıettegi oń ózgeristerdiń negizin qalap, mádenıet qyzmetkerleriniń bedelin nyǵaıtýdy qamtamasyz etedi», dedi sala basshysy.
Mınıstr oblys turǵyndarynyń suraqtaryna jaýap berip, usynystaryn tyńdady. Kezdesýge qatysýshylar mınıstrge keıingi jyldary otandyq kınoındýstrııada shyǵarylyp jatqan kontent sapasyna nazar aýdarýdy surady. Sonymen qatar, blogerlerdiń, áleýmettik jelidegi pablık ákimshileriniń jaýapkershiligin kúsheıtý, shyndyqqa sáıkes kelmeıtin jáne halyqty adastyratyn aqparatty ornalastyrýǵa qatysty másele qozǵalyp, usynystar aıtyldy. Budan bólek, halyqtyń dinı saýatyn arttyrý, balalar ádebıetin basyp shyǵarýǵa qoldaý kórsetý máselesi kóterildi.
Azamattardy jeke qabyldaý barysynda sala basshysy jas mamandardyń jalaqysyn kóterýge qatysty suraqtarǵa jaýap berdi. О́ńirdegi azamattyq sektor ókilderi tarıhı jáne mádenı mura salasyndaǵy jobalardy iske asyrýǵa qoldaý kórsetýge shaqyrdy.
Mınıstr óńirge jumys sapary barysynda óńirlik jáne respýblıkalyq BAQ ókilderimen kezdesip, otandyq medıasalany damytýǵa qatysty ózekti suraqtarǵa jaýap berdi.
«Biz sizderge barynsha jaǵdaı jasaý úshin jumys isteýdemiz, baspa basylymdary nemese elektrondyq BAQ bolsyn, múmkindigi shekteýli jandardyń aqparatqa qoljetimdiligin qamtamasyz etý, sapaly kontent jasaý úshin tehnıkalyq sharttardy pysyqtaýdamyz. 2021 jyldan bastap 6 myńnan astam jýrnalıst úzdik joǵary oqý oryndary bazasynda memorandým sheńberinde medısınalyq, ekologııalyq, dinı, qarjy-ekonomıkalyq, agrarlyq jáne IT-salalarda oqytý kýrstarynan ótti. Bul baǵyttaǵy jumys aldaǵy jyly da jalǵasady», dedi mınıstr.
Almaty oblysy
