Bereke-birligi uıysqan ajarly aýylda alystan «men-mundalaıtyn» Mádenıet úıiniń qurylysy aıaqtalyp, turǵyndardyń paıdalanýyna berilýi saltanatty túrde atalyp ótti. Sharaǵa qatysqan Raıymbek aýdanynyń ákimi Berik Dúısenbaev aýyl jurtyn qýanyshtarymen quttyqtap, 180 oryndyq ǵımarattyń el ıgiligin kórip, jas urpaqtyń ónerin ushtap, mádenıetin qalyptastyrýǵa septigi tııýine tilektestigin bildirdi.
Kópten kútken mádenı nysannyń ashylýyna aýyldyń úlken-kishisi túgel jıylyp, aq jaýlyqty analar shashýyn shashyp, qarııalar aq batasyn jaýdyrdy. Sán-saltanaty jarasqan zamanaýı úlgidegi mádenıet oshaǵynyń sahnasynda aýyl ónerpazdary áýezdi án shyrqap, bı bıledi. Qaqpaq aýylynyń qýanyshyn tasytqan shara barysynda qolóner buıymdary men ulttyq taǵam túrlerinen kóz qyzyqtyratyn kórme uıymdastyryldy.
Osy oraıda eske salsaq, ótken jyly Raıymbek aýdanynda jan jadyratarlyq jaǵymdy jańalyqtar az bolmaǵan. Sonyń biri ári biregeıi qasıetti Qarasaz aýylyndaǵy Mádenıet úıiniń aldyna Erkin Ibitanovtyń músini qoıylyp, aqyn beınesi halqymen qaıta qaýyshty.
Buǵan qosa, Shalkóde, Tekes jáne Jambyl aýyldarynda okrýg ákimdigi ǵımaratynyń qurylystary aıaqtalyp, paıdalanýǵa berilýi de aýyldyń kórkin kirgizip, eńsesin tikteýine oń áser etkeni sózsiz.
Almaty oblysy
