Quttyqtaý sózinde oblys ákimi Ǵaýez Nurmuhambetov oblysta sportqa úlken qoldaý kórsetiletinin, sonyń arqasynda jeńisti jetistikterdiń de kóp ekenin atap ótti. «Bizdiń oblys aýmaǵynda jyl saıyn kem degende 2-3 sporttyq keshen paıdalanýǵa beriledi. Olardy bilikti jattyqtyrýshylarmen, mamandarmen jabdyqtaý jáne jaǵdaı jasaý da kún tártibinen túspeıdi. Oblysta olımpıadalyq qozǵalysty damytýǵa erekshe kóńil bólinedi. Parıj qalasynda ótetin jazǵy Olımpıada oıyndaryna bizdiń veloshabandozymyz Alekseı Lýsenko osy kúnniń ózinde eki lısenzııa jeńip aldy. Taǵy 7 sportshymyz úmitker mártebesine ıe. Soltústikqazaqstandyq atletterimiz kelesi Olımpıada oıyndarynda da bıikten kórinip, elimizdiń qorjynyna júldeler salady dep senemiz», dedi ol.
Osydan keıin óńir basshysy birneshe sportshyny marapattap, syılyqtar tapsyrdy. Sonyń ishinde sýrdolımpıadanyń chempıony Farhad Qystaýbaevqa páter kiltin tabys etti. Áskerı qyzmetkerler arasyndaǵy álem chempıonatynda sátti óner kórsetkeni úshin Amanǵalı Bekbolatov pen qazaq kúresinen álem kýboginiń jeńimpazy bolǵan Altynbek Aýsaǵıtovqa, olardyń bapkerlerine Alǵyshat jáne estelik syılyqtar tapsyrdy.
О́z kezeginde Olımpıada chempıony Serik Sápıev Qyzyljar óńiri sportshylaryn Jańa jylmen, UOK qurylǵanyna 30 jyl tolýymen quttyqtap, elimizdiń sporttaǵy tabystaryna olja salyp jatqany úshin alǵysyn aıtty. «Ásirese qysqy sport oıyndary boıynsha bizdiń negizgi tiregimizdiń biri – soltústikqazaqstandyq sportshylar. Biraq keıingi jyldary jazǵy sporttyq oıyndar boıynsha da elimizdiń aldyńǵy qatarynan tabylyp júr. Bul – sportty qoldaýǵa degen janashyrlyqtyń kórinisi. Sondyqtan oblys basshylyǵy men jergilikti aýdandar basshylaryna alǵysymyz sheksiz», dedi ol. Osydan keıin Serik Sápıev Soltústikte sportty damytýǵa ólsheýsiz úles qosyp kele jatqan bir top azamatqa UOK medaldary men Alǵyshattaryn tabys etti. Olardyń arasynda qazaqtar arasynan kúresten alǵashqy sport sheberi normatıvin oryndaǵan Jambyl Tasemenov pen qazaq kúresinen osy dárejeni alǵashqy qorǵaǵandardyń biri Baýyrjan Quljanov boldy.
Petropavl
