Foto: akorda.kz
Respýblıkalyq «Egemen Qazaqstan» gazetinde jarııalanǵan suhbatynda Prezıdent Q.Toqaev qoǵamda abyń-kúbiń áńgime týdyrǵan qaýesetke qatysty pikirin aıtty. 2026 jyly ótetin prezıdenttik saılaýǵa Memleket basshysynyń túsýi múmkin eken degen sózge qatysty jaýap berdi.
«Bul – jalǵan aqparat. Budan bylaı árkim oıyna kelgenin istep, Ata zańǵa ońdy-soldy ózgeris engize almaıdy. Al osyndaı mańyzdy máselege kelgende, tipti múmkin emes. Men buǵan nyq senimdimin. Konstıtýsııalyq reforma Ata zańǵa qalaı bolsa solaı ózgeris engize berý úshin jasalǵan joq.
Prezıdent laýazymyna bir-aq ret saılaný týraly ereje endi eshqashan ózgermeıdi. Bul talap memleketimizdiń táýelsizdigi, birtutastyǵy, aýmaqtyq tutastyǵy jáne basqarý nysany týraly normalar sııaqty myzǵymastaı etip bekitilgen.
Aqyry osy taqyryp qozǵalǵan eken, buǵan qatysty keıbir jaıtqa keńirek toqtalyp, mán-jaıyn asha keteıin. Men jetijyldyq bir ǵana merzim týraly ıdeıany osydan 15 jyl buryn jabyq pikirtalastarda aıtyp júrdim. Sol kezde usynys asa qoldaý taba qoımady. О́zim Prezıdent bolyp saılanǵannan keıin, osy bastamamnyń artyqshylyǵy men kemshiligin ábden salmaqtap, ony qalaı júzege asyrýǵa bolatyny jóninde kóp oıladym», dedi Prezıdent.
Byltyr Konstıtýsııaǵa ózgeris engizýdegi negizgi maqsat sýperprezıdenttikke tán ókilettikterdi joıý bolǵandyqtan da jetijyldyq bir merzim ıdeıasyn ózi usynyp, halyq qoldaý bildirgenin aıtty.
