Batys Qazaqstan oblystyq perzenthanasynda ashylǵan erte aralasý ortalyǵy neıroortopedııalyq kinárattary men olardyń týyndaý qaýpi bar balalarǵa arnalǵan. Jańa mekeme eń zamanaýı jabdyqtarmen jabdyqtalǵan. Bul jer jylyna densaýlyǵynda kináraty bar 3 jasqa deıingi 600 balany qamtı alady. Ortalyqqa «Samuryq-Qazyna» AQ kompanııalar tobynyń biryńǵaı qaıyrymdylyq operatory – «Samruk-Kazyna Trust» qory arqyly 57 mln teńge qarjy bólingen eken.
Bul – «Samuryq qazyna» qorynyń qarjylandyrýymen «Qamqorlyq» jobasy aıasynda Oral qalasynda ashylyp otyrǵan ekinshi ońaltý ortalyǵy. Alǵashqysy 2019 jyly 18 jasqa deıingi múmkindigi shekteýli balalarǵa baǵyttalǵan bolatyn.
«Biz búgin Qazaqstan boıynsha erekshe balalar jáne olardyń ata-analary úshin 34-shi ońaltý ortalyǵyn ashyp otyrmyz. Erte aralasý ońaltý ortalyqtarynyń artyqshylyǵy – densaýlyǵynda kináraty bar balalarǵa abılıtasııalyq ońaltýdy júrgizý arqyly múgedektiginiń aldyn alýǵa kómek berý. Bul maqsatta dárigerlermen birlesken eńbektiń jemisin ata-analar qaýymy laıyqty baǵalaıdy dep senemin. Al bizdiń ulttyq ál-aýqat qory ınklıýzıvti qoǵamdy damytýǵa baǵyttalǵan ıgilikti isin ári qaraı da jalǵastyra beredi», dedi «Samuryq-Qazyna» AQ korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov.
Erte aralasý ortalyǵynda serebraldy sal aýrýy, shala týý, Daýn sındromy, damýynda týa bitken aqaýlary, bulshyq et dıstrofııasy, bosaný jaraqattary, qozǵalys buzylystary jáne júıke júıesiniń basqa da aýrýlary bar balalar ońaltýdan ótedi. Balalarmen jumys isteý úshin mehanoterapııa jáne emdik deneshynyqtyrý zaly, sensorlyq, ımmersııalyq vanna, shýngıt jáne tuz bólmeleri syndy tıimdi tehnologııa usynylǵan. Estý qabiletin jáne bas mıyn zertteýge arnalǵan dıagnostıkalyq jabdyqtar da bar.
Jalpy, «Samruk-Kazyna Trust» áleýmettik jobalardy damytý qory BQO aýmaǵynda keıingi 5 jylda jalpy somasy 360,5 mln teńgege 7 jobany iske asyrdy.
Batys Qazaqstan oblysy
