Maıkómgen aýyldyq okrýginde 1 165 adam turady. Munda orta bilim beretin mektep, balalar jáne jasóspirimder sport mektebi, dárigerlik ambýlatorııa sekildi áleýmettik nysandar bar. Endi onyń qataryna jańa mádenıet oshaǵy qosyldy. Byltyrǵy shildede qurylysy bastalǵan mádenıet úıi 200 orynǵa eseptelgen. Jańa nysanda konserttik zal, úıirmeler jáne oqytýshylar bólmesi bar. Sondaı-aq 12 oryndyq oqý zaly bar kitaphana, 4 oryndyq medıateka, kitap saqtaý bólmeleri ornalasqan.
«Memleket mereıin eńselendiretin mádenıet salasynyń ulttyq rýhanııatymyzdy qalyptastyrýda ózindik orny bar. Prezıdent ulttyń jańa sapasyn qalyptastyrý úshin bilim, mádenıet jáne ǵylym salasyn damytýǵa erekshe kóńil bólip otyr. Memleket basshysynyń tapsyrmasyna oraı aýylda sońǵy úlgidegi mádenıet oshaǵy ashyldy. Jastarǵa udaıy ulttyq ónerimizdi, qundylyqtarymyzdy dáripteıtindeı, elge adal qyzmet etetindeı tárbıe berýimiz kerek. Mádenıet úıi aýyl turǵyndarynyń bas qosatyn ordasyna aınalady», dedi oblys ákimi Serik Shápkenov.
Atyraý oblysy
