Mahambet aýdanyndaǵy Eńbekshi aýylynyń turǵyny Toqtar Tólegenuly kásibin keńeıtý úshin 1 mıllıon 380 myń teńgeniń grantyna ıe bolǵan. Ol bes jyldan beri bıe ustap, qymyz satýdy qolǵa alǵan.
«Qymyzdy daıyndaýdyń qıyndyǵy kóp. Muny osy isti kásip etkender jaqsy biledi. Grant qarjysyna qymyz pisetin, kúbi ystaıtyn qurylǵylar, bir bıe satyp aldym. Máselen, buryn saýylǵan bıe sútin kúbige quıyp, qolmen keminde 3-4 myń ret pisý kerek edi. Sol kezde qymyz daıyndaý ýaqyty tórt saǵatqa deıin sozylatyn. Al avtomatty kúbi qurylǵysyn alǵaly beri qymyzdy bir saǵatta daıyndaıtyn boldym. Kúbini ystamasa, qymyzdyń dámi kelmeıdi. Ár kúbini ystaýǵa biraz ýaqyt jumsalady. Endi kúbi ystaıtyn pesh bar», deıdi Toqtar Tólegenuly.
Qazir onyń ıeliginde 4 bıe bar. Jyl saıyn aýyldastaryna, ózge de tutynýshylarǵa dertke daýa bolar qymyz usynady. Saýmalǵa suranys kóp túsedi. Bes jyldan beri Atyraý, Qulsary, Aqtaý qalalarynan, shalǵaıdaǵy Qurmanǵazy aýdanynan turaqty tapsyrys berýshiler bar.
Toqtar Tólegenuly qymyzdy bazarǵa, ne dúkenge ótkizbeıdi. Bul – onyń aınymaıtyn ustanymy. О́ıtkeni deldaldyqqa bet burǵandar qymyzǵa sý qosýy múmkin. Al sý ulttyq sýsynnyń dámin buzady.
«Meniń tańdaýym ulttyq taǵamdardy daıyndaýǵa tústi. Bul kásipti bastaǵanyma bes jyl boldy. Bıelerge súti qunarly bolýy úshin arpa, qara bıdaı men kebek, jońyshqa beremin. Jem-shóptiń baǵasy da qymbat, aınalada mal jaıylatyn jaıylym tarylyp barady. Osy másele qıyndaý bolyp tur», deıdi T.Tólegenuly.
Oǵan jary Móldir Sısenova qoldaý kórsetip otyr. Erli-zaıyptylar bıeniń sanyn 10-ǵa jetkizýdi oılastyryp júr. Sıyr saýyp, aıran, qurt pen qaımaqty saýdaǵa shyǵarady.
«Aldaǵy jyldary balalarǵa ulttyq salt-dástúrdi nasıhattaıtyn etnoaýyl ashqym keledi. О́ıtkeni qazir balalar bos ýaqytyn telefonǵa telmirýmen ótkizedi. Bul olardyń halqymyzdyń salt-dástúrinen, ádet-ǵurpynan alshaqtaýyna áser etedi. Balalar bir mezgil altybaqan teýip, sadaq atyp, asyq oınaǵanyn qalaımyn. Aǵa býyn ókilderi etnoaýylda balalarǵa ulttyq qundylyqtyń qadiri, jón-joralǵysy týraly ulaǵatty áńgime aıtyp otyrsa, qazaqy qalpymyzdy joǵaltpas edik», dep ol oıynda júrgen josparyn jetkizdi.
Atyraý oblysy
