Nıklaýs Vırt 1934 jyly 15 aqpanda Shveısarııada dúnıege kelgen. IT atasynyń baǵdarlamalaý tili aıqyndyq, qarapaıymdylyq jáne tıimdiligimen erekshe. Vırt baǵdarlamalaý tilderi naqty bekitilgen erejeler jıyntyǵyna aınalýy kerek dep eseptegen. Sol maqsatyna jetý úshin 1968 jyly úlken top jasaqtap, ataqty fızıktiń qurmetine qoıylǵan «Paskal» til jobasyn daıyndady. Birshama eńbekten keıin ártúrli platformalarǵa ótýge múmkindik beretin aralyq p-kody bar Paskal mashınasy sıfrlyq álemge aıaq basty. Solaı 1970 jyly Nıklaýs Vırt Paskal baǵdarlamalaý tilin qurdy. Onyń negizinde Object Pascal jáne Delphi dúnıege keldi. Ǵalym bul týraly «Men ómir boıy barynsha kúshti, biraq sonymen qatar múmkindiginshe qarapaıym tildi damytýdy maqsat ettim» degen edi. Qazirgi kezde barlyq derbes kompıýterler osy tilde jumys atqarady. Paskal tilinde jazylǵan baǵdarlamanyń durystyǵy kompıýterde jeńil tekseriledi jáne jiberilgen qate tez túzetiledi. Bul baǵdarlamalaý tiliniń basty maqsaty – stýdentterge kásibı baǵdarlamalaýdy úıretý. Degenmen kúrdeli praktıkalyq máselelerdi sheshýge de jaramdy boldy. 1990 jyldary ol eń kóp taralǵan algorıtmdik tilderdiń birine aınaldy. Álemdi tez jaýlaǵan kommersııalyq alǵashqy baǵdarlamalaý tili bolyp tarıhta qaldy.
Vırt – sondaı-aq Euler, PL 360, ALGOL w, Modula jáne Oberon tilderiniń de avtory. Ol kompıýterge qatysty nebir ázirlemelerdi daıyndaıtyn «Xerox PARC» zerthanasynda da jumys istegen. 1984 jyly ınformatıka boıynsha álemdegi eń bedeldi syılyq «Tıýrıng» syılyǵynyń laýreaty boldy. Stenford ýnıversıtetinde, Sıýrıh ýnıversıtetinde, ETHZ-de qanshama jyl boıy adal jumys istedi. Nıklaýs Vırt álemniń birneshe eliniń qurmetti doktory.
