Memleket basshysy Qasym-Jomart Toqaev óziniń saılaýaldy baǵdarlamasynda elimizde 7 jyl ishinde 111 mln sharshy metr turǵyn úı salý kerektigin atap ótken edi. Osy maqsatta Úsharal qalasynda salynǵan kópqabatty turǵyn úıdiń kilti kezegi kelgen aýdan azamattaryna tabys etildi. Turǵyn úı-kommýnaldyq damýdyń 2020-2025 jyldarǵa arnalǵan «Nurly jer» memlekettik baǵdarlamasy aıasynda boı kótergen baspanany aýdandyq qurylys, sáýlet jáne qala qurylysy bóliminiń tapsyrysy negizinde merdiger «Baǵaly – Alakól» JShS salǵan.
Jalpy, aýdan kóleminde turǵyn úı kezeginde 4 sanat boıynsha 1 646 azamat tirkelgen. 5 qabatty záýlim baspanaǵa ıe bolǵandardyń basym bóligi – áleýmettik jaǵynan az qamtylǵan jáne jyldar boıy páter kezeginde turǵan otbasylar. Qonystoıdyń saltanatty jıynynda turǵyn úı kiltterin tabystap, aýdan ákimi Almas Abdınov quttyqtaý sóz sóıledi.
«Halyqtyń áleýmettik jaǵdaıyn jaqsartý, olardy baspanamen qamtý – memlekettiń áleýmettik saıasatynyń basty baǵyttarynyń biri. Osy oraıda, jyl basynda 40 otbasy baspanamen qamtylsa, búgin mine 60 otbasynyń qýanyshyna kýá bolyp otyrmyz», dedi A.Abdınov.
Onyń aıtýynsha, aýdan halqynyń áleýmettik ahýalyn jaqsartý, turǵyn úımen qamtamasyz etý aıasynda bıyl taǵy da 60 páterli turǵyn úı qoldanysqa beriledi. Sondaı-aq halyqtyń áleýmettik osal toptaǵy azamattaryna turǵyn úı kezegine sáıkes arnaıy 39 páter berý josparlanǵan. Otbasylardy turǵyn úımen qoldaýdyń keshendi modeli áli de jalǵasatyn bolady.
Oblystyń barlyq aýdany men qalasynda «Renovasııa baǵdarlamasy» bekitildi. Búginde aımaqta 1 648 kóppáterli turǵyn úı bar, onyń 38-i apatty jaǵdaıda. Osyndaı úılerde turatyn úı ıelerin jańa baspanamen qamtamasyz etý maqsatynda 2023-2029 jyldarǵa arnalǵan Jol kartasy bekitildi. Osyǵan sáıkes Tekeli qalasynda – 6, Aqsý aýdanynda 3 apatty turǵyn úı buzyldy. Byltyr osyndaı úılerdiń turǵyndary úshin páter satyp alýǵa bıýdjetten 1,2 mlrd teńge bólingen. Búginde 129 baspana óz ıesin tapty. О́tken jyldyń 1 jeltoqsandaǵy jaǵdaı boıynsha oblysta 30 153 adam turǵyn úı kezeginde tur. Onyń ishinde halyqtyń áleýmettik osal toptary – 13 179, memlekettik sektor qyzmetkerleri – 8 600, jetim jáne ata-anasynyń qamqorlyǵynsyz qalǵan balalar – 3 118, kópbalaly analar – 5 151, múgedekter men soǵys ardagerleri – 5. Al turǵyn úıi apatty dep tanylǵan adamdar sany – 100. Byltyr barlyq baǵyt boıynsha 3 147 otbasyn turǵyn úımen qamtamasyz etý josparlanyp, onyń 1205-i baspanaly boldy.
Oblystyq bıýdjetten turǵyn úı baǵdarlamalaryna qatysýshylar úshin turǵyn úı sertıfıkattaryn usynýǵa 303,0 mln teńge qarastyrylǵan. О́tken jyly 38,3 mln teńgege 31 turǵyn úı sertıfıkaty berilgen. Jaldaý tólemderi boıynsha sýbsıdııa alýǵa 29 800 adam kezekte, onyń ishinde tórt sanat boıynsha 12 221 azamat úmitker. Tabysy kúnkóris deńgeıinen aspaıtyn eń tómengi tabysy bar azamattar sany 3 562 adamdy quraıdy.
Jeke turǵyn úı qorynan jalǵa alynǵan turǵyn úı úshin azamattardyń jekelegen sanattaryna tólemderdi júzege asyrýǵa byltyr jergilikti bıýdjetten qarjy qarastyrylyp, shart kestesine sáıkes «Otbasy bank» AQ-ǵa 400 mln teńge aýdarylǵan. Soǵan saı 200 azamatqa turǵyn úıdi jalǵa alý sharty jasaldy.
Oblys boıynsha jastardy qoldaý maqsatynda óńirlik «Jetisý Jastary 0-5-25» baǵdarlamasy iske asyrylýda. Atalǵan sharalarǵa jergilikti bıýdjetten byltyr 400 mln teńge qarjy qarastyrylǵan. Búginde «Otbasy bank» AQ-na 180 azamattyń tizimi anyqtalyp, 24 azamat turǵyn úımen qamtyldy. Sonymen birge 2024 jylǵa atalǵan baǵdarlamaǵa 500 mln teńge qarastyrylyp, qazirgi kezde «Otbasy bank» AQ nesıelik shart qaralyp jatyr.
О́nerkásip jáne qurylys mınıstrliginiń jospary boıynsha 321,9 myń sharshy metr turǵyn úıdi qoldanysqa berý josparlanǵan. Onyń ishinde 162,1 myń sharshy metr jalgerlik jáne nesıelik turǵyn úı men jataqhana bıýdjet qarajaty esebinen, jeke qurylys salýshylar esebinen 22,6 myń sharshy metr, demeýshiler esebinen 15,5 myń sharshy metr, jeke turǵyn úı qurylysy esebinen 121,8 myń sharshy metr turǵyn úı salý josparlanǵan. Osy jospardy oryndaý úshin oblys bıýdjetinen 14,9 mlrd teńge bólinip, jeltoqsan aıyndaǵy jaǵdaı boıynsha 9,7 mlrd teńge ıgerilgen. Bıýdjet qarajaty esebinen 237,9 myń sharshy metr 2 810 páterden turatyn 281 turǵyn úı qurylysy salynady. Osy rette Aqsý, Alakól, Kerbulaq, Kóksý, Eskeldi, Qaratal, Panfılov aýdandary men Tekeli, Taldyqorǵan qalalarynda jalpy alańy 162,1 myń sharshy metr nesıelik jáne jalǵa beriletin 1922 páterden turatyn 57 úı paıdalanýǵa beriledi.
Jetisý oblysy
