Jankeshti degen sózimizdi sál tarqatyp, naqtylaı tússek, qalam ustaǵan qarapaıym jýrnalıst óneri aspanǵa órilgen eren júıriktiń jan dúnıesin ashý úshin onyń ónerin túsinip, bilýi shart. Al aqyl-ilimi alty qurlyqqa asyp ketken akademıkpen salıqaly áńgime qurý úshin tym quryǵanda sol ǵylymnyń túp-tegine úńile alatyn óre kerek. Taý tulǵanyń elden bıik eńbegin ádil baǵalaý úshin pafos pen paryqtyń, paıym men parasattyń arajigin ajyrata alatyn asa qarymdy qabilet qajet. Osy sharttardyń údesinen tolyq shyqqan qalamgerdi ǵana jaqsy jýrnalıst degen jón sekildi.
Búginde jýrnalıst Joldybaı Bazar qolyna qalam ustaǵaly qazaqtyń áridegi zamanynan bastap, beridegi ár kúngi tolǵaqty taqyryptaryn tolǵana jazyp júr. Únemi jaqsy men jaryqty izdegen Joldybaıdyń kótergen kóptegen taqyrybynyń bázbirin bizdiń qoǵam áli tolyq paıymdap úlgermedi me degen kúdik bar. Osydan jeti-segiz jyl buryn «Egemen Qazaqstan» gazetinde basylǵan «Kórdemshe» atty kólemdi maqalasy kópshilik ortada tóńkerisshil rezonans týdyrǵanymen, bıliktiń bıshigin ustaǵandardyń keıbiriniń meńireý mıshyǵyna sáýle bolyp quıylmady. Áıtpese, «Qan tazalyǵyn qatty ustanǵan elmiz» dep aıdaı álemge jar salyp, kókirek kótergen qazaqtyń barlyq bolmysy men ǵumyrlyq ustyny bolǵan ulttyq qundylyqtary qalaı qurı bastaǵanyn kózge shuqyǵandaı etip kórsetken «Kórdemshe» taqyrybyndaǵy mátinge mán bergen Alashtyń árbir azamaty tárbıe men dástúr jóninde, tıym men tek týraly salmaqty sóz aıtyp, qazaq bolyp qalý týraly naqty iske oıysa bastaıtyn edi.
Sýdyń tunyǵyn iship, shóptiń dárýligi mol shúıginin ǵana qorek qylatyn, qazaqqa mingende kólik, ıin qandyryp kıgende kıim, saýǵanda sýsyn, jegende asyl taǵamy bolǵan jylqy malynyń da tizgin ustaǵan barlyq qaýymǵa málim qasıetterinen artyǵyn da osy Joldybaıdyń qalamynan týǵan dúnıelerden oqyp bildik. Tuıyq ta tik tuıaqtynyń áriptesimiz áspettegen ár qasıetin táptishteı tússek, tym uzaqqa ketip qalarymyz anyq. Ony kerek qylǵan adam ózi taýyp alyp, kóz júgirtip, ıgiligine jaratyp jatsa, quba-qup.
Al endi eldik pen memlekettik sharýaǵa kelgende, kádimgi ottaı lapyldap janyp turatyn Joldybaı qaı máseleni kótermedi? Ásirese ormandaı qalyń ońtústik halqyn arasy sırep qalǵan soltústiktegi aǵaıyn-baýyrdyń arasyna kóshirip aparyp, jersindirip, turaqtandyrýy úshin jalpaq jurtyna jarııa qylǵan maǵynasy men mazmuny ǵumyrlyq usynys-tilekten turatyn «Ishki kóshi-qondy qalaı retteımiz?» atty tuǵyrly maqalasyn bıliktiń bıshigin ustaǵandardyń qaısysy paryqtap, paıymdaı bildi? Ágárakı, tıisti oryndaǵylarǵa tujyrymdamalyq máni bar osynaý maqala anyq jetip barǵanda, qazirgi kúnde ońtústikten tartylǵan kerýen kóshtiń saltanatyna qarap ár qazaq marqaıa masattanyp, maqtanyp otyrǵan bolar edi.
Jýrnalıst Joldybaı Bazardyń beldi týyndylarynyń bárin bul arada taratyp aıta berýge oryn tar. Sebebi onyń sheber oıynan týǵan prozalyq shyǵarmalarynyń ózi bir tóbe. Biz biletin Joldybaıdyń ǵumyrlyq ustanymy – salamatty urpaq tárbıelep, eldiń, jerdiń shyn qamqory men qorǵany bolatyn otansúıgish azamatty ósirip, jetildirý. Joldybaı ómirlik jary Gúlbala ekeýi alty birdeı perzentti mápelep ósirip otyr. Eldegi daryndy ári ádepti balalarǵa arnalǵan aldyńǵy qatarly mektepter sanatyna jatatyn Bilim jáne ınnovasııa lıseıin úzdik támamdaǵan eki úlken qyzdyń biri Almatydaǵy Súleımen Demırel halyqaralyq ýnıversıtetinde, al ekinshisi Qaraǵandynyń medısına ýnıversıtetinde oqyp júr. Keıingi eki ul da atalǵan lıseıde bilim alyp jatyr. Keıingileri áli balabaqshada.
Áýelde esimin bilip, qalamyn qyzyqtap júrsek te, osydan toǵyz-on jyl buryn «Egemen Qazaqstan» gazetinde Joldybaımen alǵash ret júzbe-júz tanysyp, bilistik. Únemi kóńili gúl, jaıdary kúlkisi júzinde turatyn Joldybaıdyń ómirlik ustanymy naǵyz qazaqylyq ekenine bárimizdiń kózimiz jetti. Úlkenge qurmetin, kishige izetin jasap turýdan bir jańylmaıtyn inimiz aralasqan ortada ózi de mol syı-qurmetke ıe boldy. Úlken orynda óziniń salmaqty ári júırik qalam ıesi ekenin anyq tanytyp, birer jylda gazettegi eń aýyr sanalatyn saıasat bóliminiń tizginin ustady. Bólimniń aýyr salmaǵyna qaramaı, taqyryptardy erkin meńgerip, dóńgeletip áketti. Nátıjesinde, saladaǵy eren, erek tulǵalardyń aldynda abyroı-bedelge ıe boldy. Joldybaıdyń bilimi men biligi, boıyndaǵy izgi kisiligi men kemeldenýi – soǵan laıyq.
Eldegi bas basylym sanalatyn «Egemen Qazaqstan» gazetiniń búginde mádenıet jáne ádebıet bólimine jetekshilik etip otyrǵan inimizdiń qazirgi ilgerindi eńbegi el-jurttyń nazarynda. Onyń basshylyǵymen bólim daıyndaǵan basylymnyń tanymdyq ádebı, tarıhı betterin oqyrman qaýym qumarlana oqıtynyn kóz kórip júr. Sondyqtan irgeli azamattyń eńbegin ádil baǵalaǵan ujym basshylary redaksııa janyna turǵyzǵan jańa jataqhanadan eki bólmeli úı berip, Astanadan 40 shaqyrym jerdegi Aqmol qalasynan qalap kóshirip alǵan edi. Búkil sanaly ǵumyryn jýrnalıstıkaǵa arnap kele jatqan abzal azamattyń qoly byltyr kólemi at shaptyrym páterge jetti. Oǵan sebepshi bolǵan, árıne, qazirgi gazet basshylary.
Mereıli belestegi Joldybaı baýyrymyzdyń áli de alatyn asqaraly asýy alda. Ol asýlardy qalamymen baǵyndyratynyna senemiz.
