FOTO: astana-akshamy.kz
Is-sharanyń maqsaty – óskeleń urpaqqa halqymyzǵa tanymal tulǵalardy tanystyryp, kitap oqý mádenıetin qalyptastyryp, akademııalyq kitaphananyń bedelin kóterý. Illıýstrasııaly kitap kórmesine bıyl 155 jyldyǵy atalyp ótiletin mýzyka zertteýshisi, kompozıtor Aleksandr Zataevıchtiń, týǵanyna 145 jyl tolatyn Alash qozǵalysynyń negizin salýshylardyń biri – qazaqtan shyqqan tuńǵysh temirjol ınjeneri, kórnekti memleket jáne qoǵam qaıratkeri Muhamedjan Tynyshbaevtyń, áıgili halyq aqyny, sal-serilik dástúrdiń sońǵy ókili, ánshi-kompozıtor Kenen Ázirbaevtyń 140 jyldyǵyna baılanysty mańyzdy qujattar, fotolar usynyldy. Sonymen qatar halqymyz «úsh báıterek» dep ardaq tutqan Sáken Seıfýllın, Ilııas Jansúgirov, Beıimbet Maılınniń 130 jyldyq mereıtoılaryna oraı olardyń shyǵarmashylyq jolyn bederlegen kitaptary oryn aldy.
Sondaı-aq uly ǵalym Qanysh Sátbaevtyń 125 jyldyǵy men ulttyq beıneleý óneriniń negizin qalaýshylardyń biri Ábilhan Qasteevtiń 120 jyldyǵy jáne asa kórnekti rejısser, talantty akter Sháken Aımanovtyń 110 jyldyǵyna arnap jasalǵan sóreden osy ardaqty azamattarǵa qatysty sırek kezdesetin sýretter men qujattary toptastyrylǵan. Ekinshi dúnıejúzilik soǵysta eren erlik kórsetken Keńes odaǵynyń batyrlary Raqymjan Qoshqarbaev pen Álııa Moldaǵulovanyń 100 jyldyǵyna baılanysty da olardyń erlik jolyn baıandaıtyn mazmundy dúnıeler tanystyryldy. Bıyl klassık qalamger Berdibek Soqpaqbaevtyń ǵasyrlyq toıy IýNESKO kóleminde toılanady. Soǵan oraı kórmede balalar ádebıeti darabozynyń shyǵarmashylyq murasy keń kólemde qamtylǵan. Sonymen birge mádenı is-sharaǵa kelýshiler ádebıet abyzy Ábdijámil Nurpeıisovtiń 100 jyldyǵy men qazaq ádebıetiniń qos kórnekti ókili – Ábish Kekilbaıuly men Farıza Ońǵarsynovanyń 85 jyldyǵy jáne basqa da tanymal tulǵalardyń mereıtoılaryna qatysty bas-aıaǵy 500-ge jýyq qundy qujatty qyzyǵa tamashalady.
Bul kórme kitaphana oqyrmandaryna turaqty túrde jyl boıy usynylady.
