Búgingi kúni tiri bolsa Ermek Qonarbaev aǵamyz 85 jasqa tolatyn edi. Ol 1984 jyly 46 jasynda ómirden ótken. Jýyrda S.Muqanov kitaphanasynda jazýshyǵa arnalǵan úlken kesh boldy.
Qazirgi Shal aqyn aýdanynyń Kókterek aýylynda dúnıe esigin ashqan ol 1955 jyly kórshiles Lenın aýylynyń mektebin altyn medalmen bitiredi. Sol jyly Abaı atyndaǵy Qazaq pedagogıkalyq ınstıtýtynyń tarıh-fılologııa fakýltetine túsedi. Ony jaqsy aıaqtaǵan soń óziniń ushqan uıasyna kelip, qazaq tili men ádebıetinen sabaq beredi. Alǵashqy oqýshylarynyń biri, oblystyń ardager ustazy Záýresh Qaıyrbekova sol jyly óziniń 9-synypta oqyǵanyn, Ermek Qonarbaev pen Jarasbaı Nurqanov ekeýi ınstıtýttan keıin mektepke birge kelgenin aıtty. «Ekeýi de symbatty, bilimdi, balalarǵa syıly boldy. Ásirese Ermek aǵamyz bizdiń bilimimizben qosa tanym kókjıegimizdi arttyrýǵa kóp eńbek sińirdi. Kınonyń qalaı jasalatynyn, onyń rejısseri, ssenarıı avtory bolatynyn alǵash osy aǵamyzdyń aýzynan estip edik. Ol mektepte balalardan ansambl uıymdastyrdy, ózi qyzyl akkordeonymen súıemeldep, án aıttyratyn. Sýretshiler týraly da áńgimeler aıtyp, mekteptiń bir bólmesine olardyń kartınalarynan kórme uıymdastyrdy. «Tretıakov gallereıasy» degendi de sol kezde bilgen edik. Qazir qandaı da bir kórmege barsam Ermek aǵaı esime túsedi. Ol bizge oqýlyqqa engizilmegen Qasym Amanjolov sııaqty daýylpaz aqyndardy da tanystyryp otyratyn», dedi qart ustaz.
Jazýshy, jýrnalıst Jarasbaı Súleımenov jazýshynyń shyǵarmashylyǵyna toqtaldy. «Ermek Qonarbaevtyń «Túngi ot», «Jol basy», «Tıek» atty jınaqtary kóziniń tirisinde «Jazýshy», «Jalyn» baspalarynan jaryq kórdi. Onyń keıipkerleri – aýyl turǵyndary, solardyń obrazdary. Ony «aýyl ómiriniń jyrshysy» dep atasa ábden laıyq. Jazýshylar odaǵyna ótý úshin kepildemeni oǵan Gerold Belger men Kákimbek Salyqov bergen. 1988 jyly jazýshy qaıtys bolǵannan keıin jubaıy Maıken qalamgerdiń «Qas qaǵym sát» atty kitabyn jazýshy Safýan Shaımerdenovtiń qoldaýymen bastyrady. Ermek Qonarbaevtyń shyǵarmalary «Juldyz» jýrnalynda, «Qazaq ádebıeti» gazetinde jıi basylyp turdy. Ol kóp jyl boıy oblystyq «Lenın týy» gazetiniń aýdandaǵy menshikti tilshisi bolyp jumys istedi», dedi ol.
Basqa da sóıleýshiler, sonyń ishinde jergilikti jazýshylardyń ómiri men shyǵarmashylyǵyn zerttep júretin jas jýrnalıst Samrat Quskenov Ermek Qonarbaevtyń shyǵarmashylyǵy Ǵabdol Slanov, Ǵafý Qaıyrbekov, Saıyn Muratbekov sııaqty úlken jazýshylardyń aýzyna iligip, olar jaqsy pikir bildirgenin aıtty. Ataqty jazýshy Safýan Shaımerdenov onyń shyǵarmashylyǵyn Beıimbet Maılınge teńegen eken. Al áńgime janrynyń sheberi Saıyn Muratbekov Ermek Qonarbaevtyń kóregendigin, aýyl adamdarynyń obrazyn ashýǵa sheberligin aıta kelip, «Men onyń jazǵandaryna qyzyǵa ári osylardy men neǵyp kórmedim eken dep qyzǵana qaraımyn» depti.
Ermek aǵamyz muǵalimdikpen qatar jergilikti jastar uıymynyń, bastaýysh partııanyń uıymynyń jumystaryna da tartylypty. Sonyń ishinde birneshe jyl boıy Novopokrovka orta mektebinde dırektor bolady. Jazýshynyń adamdyq bolmysy, kishipeıildigi men kisiligi, adamgershiligi týraly áńgimelerdi nemere inisi A.Baltabaev, shákirti Z.Qurmanqulov taǵy basqalar aıtty. Keshti belgili ánshi Dásten Baımuqanov ánmen árlep otyrdy. Kesh sońynan jazýshynyń qyzy Nurlygúl jınalǵandarǵa alǵysyn bildirdi.
Soltústik Qazaqstan oblysy
