Muratsaı aýylynda 773 adam, onyń ishinde 269 bala turady. Feldsherlik-akýsherlik pýnkttiń shtatynda bir feldsher, bir akýsher, tórt medbıke jáne bir meıirger bar.
Qurylysyna 303 856 168 teńge jumsalǵan jańa ǵımaratta feldsherdiń qabyldaý kabıneti, áıelderge arnalǵan qaraý bólmesi, emshara, egý, súzgi, qaqyryq alý, tirkeý bólmeleri, hımızator, qoıma, sanıtarlyq-turmystyq bólme kózdelgen. FAP barlyq qajetti medısınalyq jabdyqpen, uıymdastyrý tehnıkasymen, jylytý júıesimen jabdyqtalǵan. Nysannyń jalpy aýdany 330,81 sharshy metr, bir aýysymda 25 adamdy qabyldaı alady.
Jalpy, 2023 jyly Bókeı ordasyndaǵy eki medısınalyq nysan kúrdeli jóndeýden ótip, jańadan tórt «Jedel járdem» kóligi berildi. Oblys ortalyǵynan eń shalǵaı jatqan aýyl bolǵandyqtan, maman tapshylyǵy da seziletin. Soǵan oraı aýdanǵa byltyr eki maman keldi, al 2024 jyly taǵy tórt dáriger jas mamandy ornalastyrý josparlanǵan.
«2024 jyly Bókeı ordasy aýdanynda taǵy tórt medısınalyq pýnkt ǵımaraty kúrdeli jóndeýden ótip, bir dárigerlik ambýlatorııa salynady. 2025 jylǵa deıin eldi mekender turǵyndaryn medısınalyq qyzmetpen tolyq qamtamasyz etemiz», deıdi aýdandyq aýrýhana dırektory Anarbek Belısanov.
Osyndaı jaqsy jańalyq barlyq aýdanda bolyp jatyr. Qaztalov aýdanynyń Bostandyq aýyly turǵyndary da jańa jyl qarsańynda jańa emhana ǵımaratymen qaýyshty. Aýdan boıynsha 43 medısınalyq nysannyń halyqqa qaltqysyz qyzmet kórsetýi úshin memleket bar múmkindikti jasaıdy.
Jańa ǵımaratta dárigerler kúnine 30 adamdy qabyldaı alady. Ambýlatorııada 6 kereýettik kúndizgi stasıonar, balany damytý, fızıoprosedýra, stamotologııa, akýsher kabınetteri, zerthana bar. «Jaqynda ǵana bizdiń ambýlatorııaǵa jańa kólik berilgen edi. Osynyń bári aýyl turǵyndaryna, halyqqa degen qamqorlyq qoı. Biz de óz tarapymyzdan halyqqa sapaly medısınalyq qyzmet kórsetýge tyrysamyz», deıdi jalpy tájirıbelik dáriger Álnýra Qurmanǵalı.
«Aýyldyq densaýlyq saqtaýdy jańǵyrtý» ulttyq jobasy aıasynda Jańaqala aýdanynda da bir medısınalyq nysan jańadan salynyp, tórt nysan tolyq kúrdeli jóndeldi.
«Oblys ákimi men mekeme tarapynan kórsetiletin turǵyn úı, kótermeaqy sekildi áleýmettik qoldaý sharalarynyń nátıjesinde Jańaqala aýdanynda bes jas maman jumysqa ornalasty. Sonyń ishinde Kópjasar jáne Jańaqazan aýylyna dáriger kelip, elge qyzmet kórsetip jatyr. Bıyl naýqas tasymaldaýǵa qajetti tolyq jasaqtalǵan 3 medısınalyq kólik aldyq», deıdi Jańaqala aýdandyq aýrýhanasynyń dırektory Erbol Sársenǵalıev.
Aıta keteıik, Batys Qazaqstan oblysynda 2023 jyly densaýlyq saqtaý júıesin qarjylandyrýǵa 92,8 mlrd teńge qarastyrylǵan edi. Medısınalyq uıymdardy jaraqtandyrý úshin jergilikti bıýdjetten 3,6 mlrd teńge bólinip, 337 medısınalyq jabdyq satyp alyndy. 1 712,5 myń teńge jergilikti bıýdjet qarajatyna 81 avtokólik alynyp, aýdan men aýyldaǵy medısına mekemelerine tabys etildi. 22 densaýlyq saqtaý nysanyna kúrdeli jóndeý jumysy júrdi.
«2023 jyly oblysqa kelgen 122 jas maman jumysqa ornalastyryldy. Sonyń ishinde 50-i aýyldyq jerge bardy. 92 jas maman birjolǵy kótermeaqy alyp, 15 mamanǵa qyzmettik turǵyn úı berildi», deıdi Batys Qazaqstan oblystyq densaýlyq saqtaý basqarmasynyń basshysy Erlan Toqsanov.
Aýyl halqynyń densaýlyǵyn saqtaý, olarǵa sapaly medısınalyq qyzmet kórsetý bıyl da basty nazarda bolmaq.
Batys Qazaqstan oblysy
