Qoǵamdyq pikirdi barynsha qamtý jáne sheshimder qabyldaýdyń ashyqtyǵyn qamtamasyz etý maqsatynda Kólik mınıstrliginiń Avtomobıl kóligi jáne kóliktik baqylaý komıteti otandyq kólik-logıstıkalyq bıznes jáne júkterdi halyqaralyq avtomobılmen tasymaldaý máseleleri boıynsha logıstıka ókilderimen arnaıy keńeıtilgen keńes uıymdastyrdy. Onda salaǵa qatysty birqatar máseleler talqylandy.
Atap aıtqanda, is-shara Almatydaǵy Logıstıka jáne kólik akademııasynyń ǵımaratynda ótti. Kólik mınıstriniń jeltoqsan aıynda megapolıs turǵyndarymen kezdesýinde bergen ýádesine sáıkes Qazaqstannyń barlyq óńirinen tasymaldaýshylar ádeıilep shaqyrylǵan. Basqosý barysynda kásipkerlerge, sarapshylarǵa jáne salalyq qaýymdastyqtardyń (Kazlogistics, KazATO) jáne «Atameken» AES ókilderine qazaqstandyq tasymaldaýshylar arasynda sheteldik ruqsat blankilerin taratýdyń jańa tártibi muqııat tanystyryldy.
Taqyrypty talqylaý aıasynda QATTK tóraǵasy Altaı Áli naryq qatysýshylaryn Kólik mınıstriniń «Qazaqstan Respýblıkasy Investısııalar jáne damý mınıstri mindetin atqarýshysynyń Sheteldik ruqsat blankilerin berýdiń jańa tetigin qamtıtyn «Qazaqstan Respýblıkasynda halyqaralyq qatynasta avtomobıl kóligimen tasymaldaýǵa ruqsat berý júıesin qoldaný qaǵıdalaryn bekitý týraly» jobasyn qarastyrýdy usyndy.
Daıyndalǵan qujatta memlekettik organ ruqsat blankilerin taratý júıesindegi erkin básekeni qamtamasyz etedi. Sondaı-aq Qazaqstanda shaǵyn jáne orta bıznesti damytýdy shekteıtin, ıaǵnı, kóleńkeli naryqta blankilerdiń jasandy tapshylyǵyn týǵyzatyn máselelerdi tolyq joıady jáne olardy qaıta satýǵa múmkindik bermeıdi.
Sharttyń ár tarmaǵyna nazar salsaq, kólik quraldarynyń tasymaldaý tarıhy men qyzmetine shekteýlerdi alyp tastaýdy, belgili bir tapsyrys bolǵan jaǵdaıda kez kelgen otandyq tasymaldaýshyǵa blankilerdi berýdi, blankilerdi kóleńkeli naryqta qaıta satýdyń barlyq alǵysharttaryn joıýdy, blankilerdi berý týraly sheshimder qabyldaý úderisterinen kóliktik baqylaý ınspeksııalaryn alyp tastaýdy, sondaı-aq blankilerdi paıdalanýdy qashyqtyqtan baqylaýdy engizý kózdelgen.
Keleli keńeste, sonymen qatar naryq qatysýshylarymen halyqaralyq júk tasymaldaýdyń basqa da ózekti máseleleri de ashyq talqylandy.
