Oblystyq sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń aıtýynsha, byltyr óńirde 477 adam qyzylsha dıagnozymen tirkelgen eken. Al qańtarda 48 jaǵdaı anyqtalyp otyr. Jańa jyldyń alǵashqy on kúninde qaýipti dertpen tirkelgen 48 adamnyń 35-i – kámelet jasyna tolmaǵandar. «Oblysta qyzylsha Bókeıorda jáne Jánibekten basqa barlyq aýdanda tirkeldi», deıdi Nurlybek Ermekuly.
Ulttyq profılaktıkalyq ekpe kúntizbesine sáıkes Qazaqstanda 6 jasqa deıingi balalar ımmýnıtetti qamtamasyz etetin jáne múgedektiktiń aldyn alatyn juqpaly aýrýlarǵa qarsy negizgi 10 ekpe alýy kerek. Alaıda keıingi birneshe jyl boıy vaksınadan bas tartýshylar sany kóbeıip barady. Mamandar ınfeksııanyń kóbeıýin osy máselemen tikeleı baılanysty dep esepteıdi.
«Mysaly, qyzylshanyń arnaıy emi joq. Budan tek ekpe alý arqyly ǵana qorǵanýǵa bolady», deıdi N.Mustaev.
Qyzylshaǵa qarsy vaksına Ulttyq ımmýndaý kúntizbesine engizilgen. Balalarǵa qyzylshaǵa qarsy egý 1 jasta, al revaksınalaý 6 jasta júrgiziledi. Ekpeden keıin balanyń boıynda ınfeksııadan qorǵaıtyn ımmýnıtet paıda bolady.
«Aýrýdyń alǵashqy belgileri baıqalsa, dereý medısınalyq kómekke júginý qajet. О́z betimen em qabyldaýǵa bolmaıdy. Balańyz qandaı da bir sebeppen ekpe almaǵan bolsa, jergilikti emhanaǵa baryp, ekpe alýdy suraımyz», deıdi mamandar.
Keıingi kúnderi Batys Qazaqstan oblysynda jiti respıratorlyq vırýstyq ınfeksııaǵa shaldyqqandar sany da kóbeıip ketken. О́tken jylǵy maýsymmen salystyrǵanda 50,3% joǵarylapty. О́ńirde 1 qazannan beri osyndaı dıagnozben 98 633 jaǵdaı tirkelse, solardyń 64,1%-y – 14 jasqa deıingi balalar eken.
Qazir oqýshylar qysqy kanıkýlyn támamdap, úshinshi toqsandy bastap ketti. Sanıtarlyq-epıdemıologııalyq sala mamandary oqýshylar arasyndaǵy ınfeksııa kúrt ósip ketpeýi úshin bilim berý uıymdarynda sanıtaızer, dezınfeksııa, jýý quraldary syndy jabdyqtardyń jetkilikti bolýyn, oqýshylardyń jeke gıgıena erejelerin saqtaýyn talap etip jatyr. Jótelip, murynnan sý aǵyp, qyzýy 37 gradýstan joǵary bolyp turǵan balalardy mektep pen balabaqshaǵa kirgizbeý jóninde nusqaý berilgen.
Batys Qazaqstan oblysy
