Kollajdy jasaǵan – Záýresh SMAǴUL, «EQ»
Ulytaý oblysy 2022 jyly qurylǵanmen, oblystaǵy poshta qyzmeti ótken jyldyń sońyna deıin «Qazposhta» AQ Qaraǵandy oblystyq fılıalynyń quramynda bolyp keldi. 2023 jyldyń qazan, qarasha aılarynda Ulytaý oblystyq fılıalyn qurý týraly sheshim qabyldanǵannan keıin ǵana eki arada bólý jumystary bastaldy. Bul shara baspasózge jazylý naýqanyna kádimgideı keri áserin tıgizdi. О́ıtkeni baǵdarlamanyń durys ornatylmaýy saldarynan gazet-jýrnaldardyń baǵasy qate kórsetilip, biraz túsinbeýshilik týdyrdy. Sol kúnderi osy jaǵdaıǵa dabyl qaǵyp, bizben habarlasqan azamattar da az bolǵan joq. Solardyń biri kásipker Qııasbek Ádilbaev poshta qyzmetine degen renishin: «Jeke sharýashylyǵyma baılanysty negizinen qaladan syrtta júremin. Gazet-jýrnaldarǵa jazylý úshin ádeıi kelsem, poshtanyń baǵdarlamasy jumys istemeıdi eken. «Erteń kelińiz» deıdi. Al erteń istep ketetinine kepildik bar ma?», dep bastap, odan ári poshta qyzmetin «elimizdegi sıfrlandyrý baǵdarlamasynan shet qalǵan sala» retinde baǵalaıtynyn jetkizgen edi.
«Poshtaǵa barsań tek qolma-qol aqsha talap etedi. Qazir eldiń kóbi qaltasyna aqsha salyp júrmeıdi. Poshtanyń mobıldik aýdarymdardy qabyldaýǵa daıyn emestigi, qabiletsizdigi tańǵaldyrady», dep turǵyn sózin naqtylaı tústi. Shynynda solaı. Buǵan ózimiz de san márte kýá bolǵanbyz. Bul – qazirgi ýaqytta poshta qyzmetindegi tez arada jóndeýdi qajet etetin eń basty kemshilikterdiń biri.
«Baǵdarlama durystaldy-aý» degen kezde málimetter bazasyn anyqtaýdyń qıyndyǵy týyndady. Turǵyndarǵa gazetke qansha dana jazylǵanyn bilý múmkin bolmady. Oblys ortalyǵyndaǵy mamandar «Buryn mundaı ispen Qaraǵandy aınalysqanyn, ózderiniń tájirıbesizdigin» aıtyp aqtalyp baqty.
Munyń bárin nege aıtyp otyrmyz? О́ıtkeni 2024 jyldyń basynan óz aldyna bólek fılıal bolyp qurylǵan Ulytaý poshtasy sol bir baıqalǵan kemshilikterdi eńserip, tez arada boıyn tiktep ala qoıar ma eken? «Qazposhta» AQ Ulytaý oblystyq fılıaly dırektorynyń mindetin atqarýshy A.Bolatbekov jaǵdaıdyń kúrdeli ekenin aıtady. Eń basty másele – mamandardyń jetispeıtindigi. Qazir fılıalda, basqasyn aıtpaǵanda, bas esepshiniń orny bos tur. Árıne, jańadan qurylyp jatqan fılıaldyń uıymdastyrý sharýalary shashetekten bolatyny túsinikti. Buryn bul salada istemegen mamandardyń jumysty ıgerip ketýi ońaı emestigi de belgili. Qarapaıym ǵana baspasózge jazylý málimetterin alyp bere almaý – osy sózimizdiń bir dáleli. Demek, mamandardy qaıta oqytý, úıretý kerek.
Aıaǵynan nyq turyp ketkenshe Ulytaý fılıalyna «Qazposhtanyń» respýblıkalyq basshylyǵy tarapynan qarjylaı kómek qajettigi anyq sezilip otyr. О́ıtkeni fılıal ornalasqan ǵımaratqa kúrdeli jóndeý jasaý qajet. Ǵımarattyń ishi-syrty kóz jaýyn alyp, eldi ózine anadaıdan tartyp turýy da, ishindegi kabınetteri de qyzmetkerlerdiń jumys isteýine barynsha qolaıly bolý kerektigin aıtyp jatýdyń ózi artyq. Al qazirgi ǵımarat talapqa múldem saı kelmeıdi. Bir jaqsysy, fılıaldyń materıaldyq-tehnıkalyq bazasyn jańalaýǵa qazirdiń ózinde qajetti kómek kórsetile bastaǵan. Biraq soǵan qosa jańa fılıaldy bilikti mamandarmen qamtamasyz etý jaǵyn da respýblıka óz baqylaýynda ustap, jiti nazarǵa alǵandary jón. Bálkim, basqa óńirlerden bilikti mamandardy tartý kerek shyǵar? Biraq olardyń áleýmettik-turmystyq jaǵdaıy qalaı sheshiledi? Muny oblystyq fılıal ózdiginen sheshe almaıtyny taǵy túsinikti.
Poshta qyzmetin kópshilik ózderine hat-habardy qalaı jetkizýine qarap baǵalaıdy. Árıne, qazir burynǵydaı hat tasqyny joq. Qazirgi poshtashylardyń mindeti – gazet-jýrnaldardy ýaqtyly jetkizý. Kún saıyn shyǵatyn, aptalyq basylymdar bar. Biraq kún saıyn gazet tasıtyn poshtashy joq. Olar gazet-jýrnaldardy aptasyna bir ret qana jetkizedi. Qalalyq jerdiń ózinde jaǵdaı osyndaı bolǵanda, alys aýyldarǵa kún saıyn gazet-jýrnal jetkizilmeıtini aıtpasa da málim.
Oblystyń barlyq aýylynda poshtashy bar. Olar onsyz da jarytymsyz jalaqynyń jartysyna jumys isteıdi. Respýblıkalyq poshtanyń jańa basshylyǵy keıingi kezde olardy da syıaqydan qaldyrmaıtyn bolypty. Qarjylaı qoldaý qyzmetkerdiń jumysqa degen yntasyn arttyrary anyq.
«Eger eldi mekendegi halyq sany 2 myńnan assa, mundaı jerlerde poshta bólimshesi ashylsyn». Respýblıkalyq «Qazposhta» qazir osyndaı talap qoıa bastady. Quptarlyq qadam. Jezqazǵan men Sátbaev qalalarynyń ortasynda ornalasqan Keńgir aýyly bul talapqa saı kelgenmen, ǵımarat tabý, ony ustap turý shyǵyndaryna barǵysy joq oblystyq fılıal bólimshe ashqysy kelmeıtin syńaıly. Máseleniń qalaı sheshimin tabatynyn alǵy kúnder kórsete jatar.
«Qazposhta» AQ Ulytaý oblystyq fılıaly dırektorynyń mindetin atqarýshy A.Bolatbekov Jezqazǵan, Sátbaev qalalarynda buryn jabylyp qalǵan eki bólimniń qaıtadan ashylatynyn jetkizdi. Bul da árıne, qýanyshty habar. Áıtpese, 70 myńnan asa halqy bar Sátbaev qalasynda jalǵyz ǵana poshtanyń qyzmet kórsetýin qalaı baǵalaýǵa bolady? Hat-habar azaıǵanmen, qazirgi kezde poshtadaǵy zattaı sálemdeme tasymalynyń aýqymy molaıǵany baıqalady. О́ıtkeni poshtaǵa qashan barsań da uzyn-sonar kezekti kóresiń. Mundaıda sapaly qyzmet kórsetý týraly sóz qozǵap ta keregi shamaly. Burynǵy poshta bólimderin qaıtadan ashý jumysty jaqsartý, turǵyndarǵa qolaılylyq týdyrý maqsatynan týyndaǵany kúmánsiz.
Árıne, kiná artý ońaı. Kemshiliksiz qyzmet bolmaıtyny taǵy ras. Biraq túzetýge tıisti nárseni qolǵa almaı bolmaıdy. Jáne der kezinde túzetýge umtylǵan jón. «Qazposhtadan» kúterimiz sol ǵana.
Ulytaý oblysy
