Sýretti túsirgen – Rýslan QADYROV
Bulaı asqaqtata jazyp otyrǵanymyzdyń bir sebebi sońǵy ýaqytta esersoq estradalyq ánderden jalyǵa bastaǵan edik. Dombyranyń shanaǵynan shyqqan saryn kóńilimizdi qaıta baıyta tústi. Rýhanı kúsh berdi. Oǵan keshke kelgen árbir qonaq kýáger bola alady. Endi oblystyq mádenıet, arhıvter jáne qujattama basqarmasynyń bastamasymen júzege asqan jarqyn is-shara aı saıyn uıymdastyrylady.
Halyq áýenderimen naqyshtalǵan mıýzıkl janryndaǵy konsertke Dánesh Raqyshev atyndaǵy fılarmonııanyń elge tanymal mádenıet maıtalmandary óner kórsetti. Sonymen qatar qala jáne aýdandardan kelgen dástúrli ánshiler de qulaq quryshymyzdy qandyrdy.
«Jetisý dástúrli án mektebi – qazaqtyń kóne ánderiniń, ásirese halyqtyq áýenderdiń mol saqtalǵan ánshilik óner shoǵyry sanalady, oryndalýy men dombyrada súıemeldenýi Arqa ánderine óte uqsas, sondyqtan bul mekteptiń ókilderiniń repertýarynda Arqa sazgerleriniń ánderi de keń oryn alady. Jetisý ánshiliginiń kórnekti ókilderi retinde Jambyl, Kenen, Qapez, Pishan, Dánesh Raqyshevtardy ataı alamyz», deıdi fılarmonııa dırektory Samat Jeksenbaev.
Atalǵan án keshine arnaıy shaqyrylǵan zııaly qaýym ókilderi men qala turǵyndary ulttyń uly ónerin asqaqtatqan osyndaı keshtiń jıi bolyp turýyn tilep, tarqady.
Jetisý oblysy
