Foto: aikyn.kz
«Qazaqstan Respýblıkasynyń aýmaǵynda ýaqytty esepteý tártibi týraly» Úkimet qaýlysyna ózgerister engizilgen bolatyn. О́zgeristerge sáıkes, 2024 jylǵy 1 naýryzda saǵat 00:00-den bastap eldiń búkil aýmaǵynda biryńǵaı ýaqyt beldeýi ornatylady.
Osylaısha, Qazaqstannyń búkil aýmaǵyna 5-shi ýaqyt beldeýi (UTC+5) qoldanylady.
«Qazaqstan Respýblıkasynyń aýmaǵyndaǵy ýaqytty esepteý tártibi týraly» Qazaqstan Respýblıkasy Úkimetiniń 2000 jylǵy 23 qarashadaǵy N 1749 qaýlysyna engizilgen ózgertýlerge sáıkes, «Astana, Almaty qalalarynyń ákimdikteri, Shymkent, Aqmola, Almaty, Jambyl, Qaraǵandy, Qostanaı, Pavlodar, Soltústik Qazaqstan, Túrkistan, Shyǵys Qazaqstan oblystarynda jáne Abaı, Jetisý, Ulytaý oblystarynda 2024 jylǵy 29 aqpannan 1 naýryzǵa qaraǵan túni (saǵat 00:00-de) jergilikti ýaqytty 1 saǵatqa artqa qoıý kerek».
Aıta ketsek, búginde Qazaqstanda UTC+5 jáne UTC+6 eki ýaqyt beldeýi bar. El aýmaǵynyń kóp bóligi (batys oblystardy qospaǵanda) UTC+6 aımaǵynda ornalasqan.
Elimizde biryńǵaı ýaqyt beldeýin ornatýdy ýaqytty esepteý máseleleri jónindegi jumys tobyna kirgen otandyq ǵalymdar men sarapshylar usynǵan.
Jumys toby 2023 jyldyń aqpanynda el azamattarynyń eń qolaıly ýaqyt beldeýine kóshý týraly birneshe márte kelip túsken ótinishterine baılanysty qurylǵan. Onyń quramyna ǵylymı ınstıtýttardyń, medısınalyq joǵary oqý oryndarynyń, ortalyq jáne jergilikti memlekettik organdardyń ókilderi, Parlament depýtattary jáne t. b. kirdi.
Jumys tobyna qatysýshylar UTC+5 biryńǵaı ýaqyt beldeýine kóshý eń durys jáne ońtaıly nusqasy ekenin jáne Qazaqstannyń kóptegen aımaqtary tabıǵı ýaqytqa eń jaqyn ýaqytty paıdalanatyn bolady degen ortaq pikirge keldi.
Bul rette jumys toby halyqaralyq tájirıbeni saralap, álemniń 175 elinde biryńǵaı ýaqyt beldeýi qoldanylsa, 22 memleket birneshe ýaqyt beldeýinde tur.
Sondaı-aq sarapshylar biryńǵaı ýaqyt beldeýin belgileý elimizdiń ár óńiriniń turǵyndary arasyndaǵy ýaqytsha kedergilerdi joıyp, kólik jáne basqa da kommýnıkasııalardy úılestirýdi jaqsartyp, bıznesti júrgizýge, memlekettik organdardyń ózara is-qımylyna oń áserin tıgizetinin atap ótti.
Qaýly resmı túrde jarııalanyp, 2024 jylǵy 1 naýryzdan bastap qoldanysqa engiziledi.
