Foto: agrosektor.kz
Osy jyly kóktemgi egis jáne egin jınaý jumystaryn júrgizý maqsatynda jeńildetilgen kredıt berý úshin bas-aıaǵy 140 mlrd teńge kóleminde qarjy bólindi. Bul sýmma kem degende 2 mln gektar alqapqa egin egýge múmkindik beredi.
Baǵdarlama boıynsha dıhandarǵa kredıt 2025 jyldyń 1 naýryzyna deıin beriledi. Onyń ishinde negizgi qaryz ben syıaqy somasynyń 50 paıyzyn 2024 jylǵy 1 jeltoqsanǵa deıin, qalǵan 50 paıyzyn keler jyldyń 1 naýryzyna deıin rásimdeýge bolady. Agrarlarǵa arnalǵan nesıe jyldyq 5 paıyzdan aspaıtyn mólsherleme boıynsha beriledi. Nesıeni óteý kestesi sharýalardyń qaryz sharttaryn jasasý kezinde jeke tártippen qarastyrylady.
«Agrarlyq nesıe korporasııasy» AQ jeńildetilgen nesıeni óńirlerde ekinshi deńgeıdegi bankter, kredıttik seriktestikter, mıkroqarjy uıymdary jáne óńirlik ınvestısııalyq ortalyqtar arqyly júzege asyrady.
«Aıta keteıik, buǵan deıin Aýyl sharýashylyǵy mınıstrligi syıaqy mólsherlemelerin sýbsıdııalaý sharttaryna ózgerister engizgen bolatyn. Engizilgen ózgeris qaryz alýshy úshin qıyndyq týdyratyn mán-jaılardyń bastalýyna baılanysty syıaqy mólsherlemesin tóleý jáne (nemese) negizgi boryshty óteý boıynsha keıinge qaldyrý merzimin 10 aıdan 24 aıǵa deıin uzartýǵa múmkindik beredi. Túzetýler osy jyldyń 15 qańtarynda kúshine endi», dep habarlady mınıstrliktiń baspasóz qyzmeti.
«Keń dala» kóktemgi dala jáne egin jınaý jumystaryna kredıt berý boıynsha jeńildetilgen baǵdarlamasy bıýdjettik kredıtti qaıta qurylymdaıdy. Bul baǵdarlama qatysýshylaryna 2023 jylǵy qaryzdaryn aıyppul sanksııalaryn qoldanbaı-aq tóleý múmkindigin beredi.
