Konkýrsqa barlyǵy 1,5 myńdaı ónerli jastar qatysty, sonyń 21 bizdiń balalar edi. Festıval Máskeýdiń «Kosmos» qonaqúıiniń úlken konserttik zalynda boldy. Ádil qazylardyń qatarynda Iý.Grıgorovıch atyndaǵy konkýrstyń «Horeograf» nomınasııasy boıynsha eki dúrkin laýreaty, N.Sas atyndaǵy balalar mýzykalyq teatrynyń qoıýshy-rejısseri E.Baryshnıkova, halyqaralyq deńgeıdegi top-pedagogtardyń biri D.Akımenko sııaqty bilikti adamdar boldy.
Reseıdiń barlyq óńirlerinen kelgen ónerpaz ulandar arasynda «Qarlyǵash» ansambli Qazaqstannan jalǵyz baryp, «halyqtyń stıldik bıi» nomınasııasy boıynsha óner kórsetti. Olar «Sulý qyzdar» jáne «Severnye kartınkı» atty eki nómir oryndady.
Jeńimpaz ulandardy poezdan Petropavl qalasynyń ákimi S.Muhamedıev bastaǵan resmı adamdar, ustazdar men týystary qýanyshpen qarsy aldy. «Balalarymyzdyń úlken jeńiske jetkenine qýanyshtymyz. Olar búkil Qazaqstannyń atyn shyǵaryp, úlken tabyspen oralyp otyr. Biz olardyń bolashaqta da úlken bıikterden kórinýin tileımiz», dedi ákim óziniń sózinde.
Ansambldiń kórkemdik jetekshisi Galına Jumalıevanyń qýanyshy erekshe deýge bolady. Ol qýanyshtan tolqyp turyp óziniń sezimin bylaı jetkizdi: «Shynyn aıtqanda biz qatty tolqydyq. Reseıdiń barlyq óńirlerinen kelgen horegrafııalyq ujymdardyń daıyndyǵy óte kúshti eken. Bári de jalyndap turǵan jastar. Olardyń arasynda bizdiń ujym men úshin barynsha qarapaıym, salǵyrt bolyp kórindi. Biraq sahnaǵa shyqqanda bizdiń balalar erledi. О́zimizdiń ulttyq kolorıtimizdi jarqyldatyp, qazaq óneriniń otyn laýlatyp jiberdi. Bizdiń balalarǵa bári de qatty rıza bolyp, uzaq ýaqyt qol soqty. Bizdiń bıimiz festıvaldyń úlken jańalyǵyndaı boldy. Sondyqtan da ádil qazylar bizge birinshi oryn berdi», dedi ol.
«Qarlyǵash» ansambliniń qurylǵanyna 50 jyldaı ýaqyt bolǵan. Ol buǵan deıin de elimizdiń jáne álemdik birneshe sahnalarda óner kórsetken. Tek sońǵy jyldary ǵana Shymkent, Astana, Almaty sahnalarynan kórindi. Ujymnyń qazirgi horeografy Vıktorııa Tıhonkova birneshe jyldardan beri jumys isteıdi. «Bizdiń ansambl negizinen halyq bılerin oryndaýǵa mamandanǵan. Repertýarymyzda qazaq, orys jáne basqa da halyqtardyń ulttyq bıleri bar. Biz Máskeýge birinshi ret bardyq, ondaǵy mamandardyń eńbegimizdi joǵary baǵalaǵanyna qýanyshtymyn», dedi ol.
Qarsy alýshylar ónerpazdarǵa túrli syılyqtar, dıplomdar men kýboktar tapsyrdy. Máskeý festıvalinde olarǵa Týapse qalasynda bolatyn festıvalǵa shaqyrý berilgen. Sonymen birge ansambl osy jazda Sankt-Peterbýrgte bolatyn festıvalǵa qatysýdan úmitti.
