Jumyla kótergen júk jeńil

Munyń alǵysharttary qatarynda ekonomıkany ártaraptandyrý, ony monopolııanyń qarmaǵynan bosatý, ınfraqurylymdy jańǵyrtý, bıznesti qoldaý, ınvestısııa tartý t.b. erekshe atap ótýge bolady.

Prezıdent Úkimet tarapynan memleket tarapynan halyqtyń áleýmettik jaǵynan osal toptaryn qoldaýdy nazardan tys qaldyrmaıtynyn, onyń júıeli túrde sheshý joldary qarastyrylyp otyrǵanyn aıtty. Turmys taýqymeti arqaǵa aıazdaı batyp, bankterden turmystyq jaǵdaıǵa baılanysty kredıt alyp, ony óteı almaı júrgen jandarǵa kómek retinde keshendi jumys­tar qolǵa alyndy jáne bul baǵyttaǵy jumys jalǵasady. Bul oraıda Prezıdent: «Men azamattarymyzdyń qaryzǵa belsheden batqanyna qatty alańdaımyn. Sebebi bul másele jurttyń áleýmettik jaǵda­ıy­na jáne elimizdegi qar­jy júıesiniń turaqtylyǵy­na tikeleı áser etedi. Men 2019 jyly Memleket basshysy retinde qol qoıǵan alǵashqy qujattyń biri qıyn jaǵdaıǵa tap bolǵan azamattardyń boryshyn azaıtý týraly Jar­lyq edi. Sol ýaqytta 500 myń adamnyń kepilsiz alǵan nesıesi keshirildi. Bul birrettik shara bolatyn. Al 2023 jyly jeke tulǵalardyń bankrottyǵy týraly zań kúshine endi. Mu­nyń bári máseleniń ýshyǵyp ketpeýine yqpal etti. Osy jaǵdaıdy túbegeıli ózgertý úshin byltyrǵy Joldaýymda Úkimetke tyń sharalardy qolǵa alýdy tapsyrdym», dedi.

Suhbatta ishki saıası turaq­ty­lyq, syrtqy saıasattaǵy ba­ǵyt-baǵdar, ózge de jurt­­shylyq kókeıinde júr­gen túıt­kildi máseleler talqy­lan­ǵan. Qasiretti qańtar oqı­ǵasynyń týyndaýynyń sebep-saldarlary, álemdegi geosaıası jaǵdaıdyń ýshyǵyp turǵan kezeńinde elimizdiń ustanymy aıqyndalǵan.

Ishki turaqsyzdyq týyn­daǵan sátte memlekettik bılik álsirep, syrtqy kúshter­diń túrli sıpattaǵy áreket­teri kúsheıip, eldiń táýelsizdi­gine qaýip tónetini tarıhtan belgili. Sondyqtan Memleket basshysy áleýmettik-ekonomıkalyq damýdy, saıası turaqtylyq­ty qamtamasyz etýdiń mańyz­yn atady. Al bul jalǵyz Prezıdenttiń qolynan keletin is emes. Ony el-jurt bolyp qoldaý kerek. «Jumyla kótergen júk jeńil» deıdi halyq danalyǵy. Qaı salada bolsyn jurtymyzdyń judyryqtaı jumylatyn kezi keldi. Oı men is-árekette de ozyq bolar kez týyndap tur. Prezıdent suhbatynan biz osyndaı baılam jasadyq.

Almasbek ÁBSADYQ,

A. Baıtursynuly atyndaǵy  Qostanaı ýnıversıtetiniń professory, fılologııa ǵylymdarynyń doktory